Pýtın orys tili boıynsha halyqaralyq uıym qurý ıdeıasy úshin Toqaevqa alǵys aıtty
ASTANA. KAZINFORM — Bul málimdemesin Reseı Prezıdenti Vladımır Pýtın Peterbýrg halyqaralyq ekonomıkalyq forýmy aıasynda halyqaralyq agenttikterdiń ókilderimen kezdesýde jasady.
Ol Qazaqstan men Reseıdiń bilim salasyndaǵy seriktestiginiń mańyzyna toqtalyp, kóptegen qazaqstandyq Reseı JOO-larynda oqyp jatqanyn atap ótti.
– Qazaqstan Prezıdentine orys tilin qoldaý boıynsha halyqaralyq uıym qurý bastamasyn kótergeni úshin alǵys aıtamyz. Menińshe, bul bolashaqqa, gýmanıtarlyq aspektilerdi qosa alǵanda bizdiń qarym-qatynastarymyzdy saqtap, ony barlyq baǵyt boıynsha damytýǵa baǵyttalǵan, – dedi Reseı Prezıdenti QR Prezıdenti teleradıokesheniniń bas dırektory Raýshan Qajybaevanyń suraǵyna jaýap bere otyryp.
Aıta keteıik, buǵan deıin Pýtın «Sırıýs» mektebi týraly aıtyp, Qazaqstanda daryndy balalar kóp ekenin málimdegenin jazǵanbyz.
