Pýtın Nobel syılyǵyna usynyldy
ASTANA. QazAqparat - Frantsııanyń «Saıası jáne halyqaralyq qatynastar ortalyǵynyń» (CFPA) basshysy Faben Bossar Reseı prezıdenti Vladımır Pýtınniń kandıdatýrasyn Nobel syılyǵyna resmı túrde usyndy, dep habarlaıdy QazAqparat Reseı Jańalyqtary agenttigine silteme jasap.
Saıasatkerdiń aıtýynsha, ol Nobel komıtetine jibergen hatynda reseılik kóshbasshy bul marapatqa óziniń bitimgerlik talpynystary úshin laıyqty ekendigin jazǵan. Bossar ózge sarapshylar men saıasatkerler onyń usynǵan kandıdatýrasyna qoldaý bildiretinine úmitti.
Ol kezinde AQSh prezıdenti Barak Obama amerıkalyq áskerler Irakta áli de qalyp otyrǵan kezde Nobel syılyǵyn alǵanyn eske saldy. Osylaısha, Bossardyń pikirinshe, Sırııadaǵy lańkesterdiń bekinisteri boıynsha áýesoqqylar túrli beıbit bastamalardy kóterip otyrǵan reseılik kóshbasshyǵa nobeldik syılyqty berýge kedergi keltirmeýi tıis.
«Menińshe, prezıdent Pýtın oǵan laıyqty. Ol lańkestikpen naqty kúresip otyrǵan jalǵyz adam», - dep qosyp ótti uıym basshysy.
Nobel syılyǵy 1901 jyldan beri beıbitshilikti nyǵaıtýǵa ólsheýsiz úles qosqan adamdar men uıymdarǵa berilip keledi.
