Pýtın men Zelenskıı Tramptyń beıbitshilik josparyna jaýap berdi
ASTANA. KAZINFORM — Reseı men Ýkraına basshylary Donald Tramptyń beıbitshilik josparyna qatysýy múmkin ekenin aıtty, biraq onyń sátti aıaqtalýyna kúmán keltirdi, dep habarlaıdy Kazinform agenttiginiń menshikti tilshisi ABC News-ke silteme jasap.
Ýkraına prezıdenti Vladımır Zelenskıı óz eli qıyn tańdaý aldynda qalýy múmkin ekenin eskertti: «qadir-qasıetin» joǵaltý nemese eń mańyzdy odaqtasynyń qoldaýynan aıyrylý — bul rette ol eldiń atyn atamady. Zelenskıı kelesi apta «óte kúrdeli» bolatynyn aıtty.
Vladımır Pýtın Ulttyq qaýipsizdik keńesi múshelerimen kezdesý kezinde Máskeý «túbegeıli beıbit retteý» úshin ázirlengen 28 tarmaqtan turatyn jospardy negizge alýǵa daıyn ekenin, biraq ony áli egjeı-tegjeıli qarastyrmaǵanyn jetkizdi.
Pýtın Reseı bul jospardyń nusqasyn bıyl jazda Alıaskadaǵy sammıt kezinde Tramp ákimshiligimen talqylaǵanyn jáne 28 tarmaqtan turatyn jobany «negizinen jańartylǵan» nusqa dep atady.
Resmı túrde 28 tarmaqtan turatyn beıbitshilik josparynda «Ýkraına senimdi qaýipsizdik kepildikterine ıe bolady» dep kórsetilgen, oǵan NATO tarapynan beriletin qaýipsizdik kepildikteri de kiredi.
Bul jospar sońǵy aptalarda Ýkraına aýyr shyǵyndarǵa ushyrap, Reseı áskeri jańa aýmaqtardy basyp alǵannan keıin ázirlengen. Zelenskıı qazir soǵys bastalǵaly bolǵan eń úlken korrýptsııalyq janjalǵa baılanysty qysymǵa túsip otyr. Bul janjal onyń ákimshiligindegi joǵary laýazymdy adamdardy qamtyǵan, sondyqtan ol Zelenskıı bıligine úlken soqqy boldy.
Eske salsaq, Tramptyń Ýkraınadaǵy soǵysty toqtatýǵa arnalǵan 28 tarmaqtan turatyn josparyn Memlekettik hatshy Marko Rýbıonyń qatysýymen AQSh prezıdentiniń arnaıy elshisi Stıv Ýıtkoff ázirledi.
Ázirge aldyn ala jáne ózgerýi múmkin jospar beısenbi kúni Ýkraına prezıdenti Vladımır Zelenskııge tanystyryldy.
Buǵan deıin Tramp Ýkraına boıynsha josparǵa qol qoıýdyń «yńǵaıly merzimi» retinde kelesi beısenbi — 27 qarasha, Alǵys aıtý kúnin belgilegeni habarlanǵan bolatyn.
Osydan buryn Memleket basshysy Qasym-Jomart Toqaev BUU minberinde Ýkraına aınalasyndaǵy daǵdarysty sheshýdiń basty qaǵıdatyn atady.
Sondaı-aq qazaqstandyq saıasattanýshy Reseı — Ýkraına máselesinde Qazaqstannyń yqpaly qandaı ekenin aıtyp berdi.