Pýtın men Zelenskıı kezdesýi tıis – Tramp

ASTANA. KAZINFORM – AQSh prezıdenti Donald Tramp Reseı prezıdenti Vladımır Pýtın men Ýkraına basshysy Vladımır Zelenskııdiń kezdesýi ótýi tıis ekenin málimdedi, dep jazdy The Washington Post.

Juma kúni jýrnalıstermen áńgime barysynda Tramp atalǵan kezdesýdiń «mindetti túrde ótetinin» aıtty.

Aıta keteıik, Kreml jaqyn bolashaqta eki el basshysynyń kelissóz ótkizý múmkindigin joqqa shyǵarǵan bolatyn.

Aq úıden Shotlandııaǵa attanar aldynda Tramp Máskeýge qatysty «ekinshi rettik sanktsııalar» salynýy múmkin ekenin taǵy eskertti. Bul shekteýler Reseımen bıznes júrgizip otyrǵan elder men uıymdarǵa áser etýi múmkin.

Buǵan deıin Stambýlda Reseı men Ýkraına delegatsııalary arasynda ótken kelissózderdiń nátıjeleri týraly habarlanǵan edi. 2 maýsymda eki tarap ózara almastyrǵan memorandýmdar aıasynda memleket basshylarynyń yqtımal kezdesýi de talqylanǵan.