Úsh saǵatqa jýyq ýaqyt kelissóz júrgizgen Tramp pen Pýtın kelisimge kele almady
ASTANA. KAZINFORM – Vladımır Pýtın men Donald Tramptyń kelissózderi Alıaska shtatynyń Ankorıdj qalasyndaǵy «Elmendorf-Rıchardson» áskerı bazasynda ótip jatyr.
Pýtın men Tramptyń birlesken baspasóz máslıhaty aıaqtaldy.
Pýtın men Tramp sammıtiniń qorytyndysy
Vladımır Pýtın Reseıdiń Ýkraına qaýipsizdigi jolynda jumys isteýge daıyn ekendigin málimdedi.
- Ýkraın halqy — bizdiń baýyrlas halqymyz. Reseı Ýkraınadaǵy qaqtyǵysty toqtatýǵa shyn nıetimen múddeli. Daǵdarystyń barlyq bastapqy sebebi joıylýy tıis. Kıev janjaldy retteýge baǵyttalǵan progreske kedergi keltirmeıdi dep úmittenemiz. — dedi Pýtın.
AQSh prezıdenti Donald Tramp Reseı prezıdenti Vladımır Pýtınmen ekijaqty kezdesý barysynda «belgili bir ilgerileýge» jáne «úlken progreske» qol jetkizgenderin aıtty. Biraq «kelisimge qol jetkizilmeı eshqandaı mámile bolmaıtyndyǵyn» atap ótti.
— Biraz ýaqyttan keıin NATO-ǵa qońyraý shalamyn. Qajet dep sanaıtyn adamdarǵa habarlasamyn. Árıne, prezıdent [Vladımır] Zelenskııge de qońyraý shalyp, búgingi kezdesý jaıynda aıtamyn. Túptep kelgende barlyǵy solarǵa baılanysty, — dedi Tramp búgin Ankorıdjdegi sammıtten keıin.
— Biz óte nátıjeli kezdesý ótkizdik jáne kóptegen tarmaq boıynsha kelisimge keldik. Maqsatqa tolyq qol jetkize almadyq. Alaıda, oǵan jetýdiń jaqsy múmkindikteri bar, - dep qosty Tramp.
Baspasóz máslıhatynyń sońynda Pýtın kelesi kezdesýdi Máskeýde ótkizýdi usyndy. Tramp bul qyzyqty usynys ekenin aıtyp, synǵa qaramastan, ondaı múmkindik baryn joqqa shyǵarmady.
Prezıdentter jınalǵan jýrnalısterdiń suraqtaryna jaýap bermeı minberden túsip ketti.
Reseı men AQSh delgatsııalarynyń aldynda josparlanǵan túski asy bolmaıtyn boldy.
Ekijaqty kezdesýden soń Pýtın Fort-Rıchardson momerıaldy zıratynda Keńes soldattarynyń múrdesine gúl shoǵyn qoıdy.
Pýtınniń jumys sapary aıaqtaldy. Kremldiń Telegram-arnasynda ushaqqa otyryp jatqan prezıdenttiń vıdeosy jarııalandy. Reseı kóshbasshysy baspaldaqpen kóterilip bara jatyp toqtap, qolyn bulǵap, basyn ıdi.
Reseı prezıdentinen soń Tramp ta Alıaskadan ketti.
Kelissózder qalaı ótti?
Reseı men AQSh kóshbasshylary birlesken baspasóz máslıhatyn ótkizý úshin jýrnalıster aldyna shyqty.
Pýtın men Tramptyń shaǵyn quramdaǵy kelissózderi aıaqtaldy, dep jazdy TASS. Reseı men AQSh prezıdentteri shaǵyn quramda 3 saǵatqa jýyq áńgimelesti.
BAQ ókilderi Pýtın men Tramp baspasóz máslıhatyn kútip otyr.
«Úshte úsh» formatyndaǵy reseılik-amerıkalyq sammıt 2 saǵattan astam ýaqyt ótip jatyr.
Reseı men AQSh prezıdentteri Ankorıdjdegi «Elmendorf-Rıchardson» áskerı bazasynda kelissózder bastady, dep jazdy CNN.
Kezdesýge prezıdenttiń kómekshisi ıÝrıı Ýshakov pen Reseı syrtqy ister mınıstri Sergeı Lavrov, AQSh tarapynan memlekettik hatshy Marko Rýbıo men AQSh kóshbasshysynyń arnaıy ókili Stıven Ýıtkoff qatysyp otyr.
Pursuing Peace. 🇺🇸🇷🇺 pic.twitter.com/d9VqKzpF6g
— The White House (@WhiteHouse) August 15, 2025
Buǵan deıin RF prezıdentiniń kómekshisi ıÝrıı Ýshakov Vladımıra Pýtın men Donald Tramptyń áńgimesi tek ekeýara ótetindigin, oǵan aýdarmashylar ǵana qatysatyndyǵyn málimdegen edi.
Degenmen, AQSh ákimshiliginiń baspasóz hatshysy Kerolaın Lıvıtt Aq úı baspasóz-pýlynyń tilshilerine kezdesýdi betpe-bet emes, «úshte-úsh» formatynda ótkizý týraly sheshim qabyldanǵanyn aıtty.
Keńeıtilgen quramdaǵy kezdesýge AQSh qarjy jáne saýda mınıstrleri Skott Bessent pen Govard Latnık, Aq úı apparatynyń basshysy Sıýzan Ýaıls, qorǵanys mınıstri Pıt Hegset qatysady.
Tramp Pýtındi ushaq baspaldaǵynda jeke ózi qarsy alǵannan keıin memleket basshylary qyzyl kilemmen júrip ótti. Jazǵy alańda sýretke túsý saltanaty aldynda bir-eki aýyz sóz almasty. Qysqa ǵana is-sharadan keıin ekeýi bir-birimen qol alysyp, sodan soń Tramptyń Cadillac kóligine minip jol tartty.
Osyǵan deıin Pýtınniń Alıaskadaǵy sammıtke daıyndyq jóninde keńes ótkizgeni týraly jazdyq.