Pýtın men Tramptyń arnaıy ókili Ýıtkofftyń kezdesýi aıaqtaldy
ASTANA. KAZINFORM — Reseı prezıdenti Vladımır Pýtın men AQSh prezıdentiniń arnaıy ókili Stıv Ýıtkofftyń kezdesýi aıaqtaldy.
Bul týraly Reseı prezıdentiniń baspasóz hatshysy Dmıtrıı Peskov málimdedi, dep habarlaıdy Kazinform TASS agenttigine silteme jasap.
Kezdesý barysynda Vladımır Pýtın AQSh prezıdenti Donald Tramptyń arnaıy ókiline Ýkraınadaǵy qaqtyǵys máselesine kóńil bólgeni úshin alǵys aıtty.
Eske salaıyq, buǵan deıin AQSh prezıdentiniń arnaıy ókili Stıv Ýıtkoff Osloda Ýkraına jáne Eýropa taraptarymen kelissózder ótkizgennen keıin Sankt-Peterbýrgke barǵanyn habarlaǵanbyz.
Oslodan ushyp shyqqan Bombardier ushaǵy Pýlkovo-3 áýejaıyna qonǵan. Amerıkalyq ókildi Reseı prezıdentiniń shet memlekettermen ınvestıtsııalyq-ekonomıkalyq yntymaqtastyq jónindegi arnaıy ókili, Reseıdiń Tikeleı ınvestıtsııalar qorynyń basshysy Kırıll Dmıtrıev qarsy aldy. Keıin olar áýejaıdan birge ketken.
20 qazanda Stıv Ýıtkoff Osloda Ýkraına prezıdenti Vladımır Zelenskıımen, Norvegııa premer-mınıstri Ionas Gar Steremen jáne Fınlıandııa prezıdenti Aleksandr Stýbbpen kelissózder ótkizdi. Kezdesýde Reseı men Ýkraına arasyndaǵy qaqtyǵysty retteý jáne Eýropanyń bolashaq qaýipsizdik arhıtektýrasyn qalyptastyrý máseleleri talqylandy.
