Pýtın men Tramp kelissózderiniń tabysty bolǵanyn aıtýǵa áli erte — saıasattanýshy
ASTANA. KAZINFORM – Belgili saıasattanýshy Arkadıı Dýbnov Reseı prezıdenti Vladımır Pýtın men AQSh prezıdenti Donald Tramptyń kelissózderine qatysty pikir bildirdi.
— Kelissózderdiń qalaı ótkenin biz syrttan ǵana baǵalaı alamyz, men kýáger de, qatysýshy da bolmadym. Sondyqtan bul tek qana pikir, biraq kez kelgen detal mańyzdy. Bul úlken serpilis bolǵan joq, úlken jetistik te emes, tipti sátsizdikke jaqyn deýge bolady. Biraq buǵan túpkilikti baǵa keıin beriledi. Mańyzdysy – Pýtınniń baspasóz hatshysy Dmıtrıı Peskov aıtqandaı 6-7 saǵat emes, bar-joǵy úsh saǵattan sál artyq ýaqytqa sozylǵany. Bul da onyń asa nátıjeli bolmaǵanynyń belgisi, — dedi Dýbnov.
Saıasattanýshy kelissóz barysynda taǵy bir mán beretin detalǵa toqtaldy.
— Kezdesý bastapqyda tet-a-tet formatynda josparlanǵan. Biraq amerıkalyq tarap ony úshke úsh formatynda ótkizýdi jón kórdi. Óıtkeni, Tramp uzaq ári mazmundy áńgimege jalǵyz ózi tótep bere almaıdy. Bul da kezdesý sıpatyna áser etti, — dedi ol.
Dýbnovtyń paıymynsha, amerıkalyq taraptyń bul kezdesýden kútkeni tym joǵary bolǵan.
— Ásirese Tramptyń ózi. Buǵan mysal – Ankorıdj áýejaıynda Pýtındi qarsy alý kezinde bolǵan kórinis. Resmı jazbadan Tramptyń Pýtınge qol soǵyp qarsy alǵan sáti qıylyp tastaldy. Bul tym optımıstik kórinis retinde qabyldandy jáne ádepsiz kóringen bolýy múmkin, — dep atap ótti sarapshy.
Al negizgi mánine kelsek, Pýtın «ózgeniń alańynda» jeńiske jetkendeı áser qaldyrdy. Bul da Arkadıı Dýbnovtyń oıy.
— Ol Trampty óz sharttaryna kóndirmedi, biraq Tramptyń da kútken nátıjesin bermedi. Buǵan deıin AQSh ókili Ýıtkoff pen Pýtın arasyndaǵy kelissózderde terrıtorııalyq másele boıynsha túsinispeýshilik bolǵany baıqalady. Bálkim, aýdarmanyń durys bolmaýy nemese usynystyń naqty jetkizilmeýi sebep bolǵan shyǵar, — dedi ol.
Onyń aıtýynsha, basty qorytyndy – «Pýtın Ýkraına tóńireginde keshendi sheshimge qol jetkizbeıinshe, bitimge kelýge daıyn emes».
— Bul Reseıdiń qaýipsizdik talaptaryn qatań oryndaýdy, Eýropadaǵy jańa qaýipsizdik júıesin qurýdy qamtıdy. Demek, soǵysty toqtatý aldaǵy aptada nemese aıda múmkin emes. Tipti senator Lındsı Grem «eń erte beıbit sheshimge osy jyldyń Rojdestvosynda ǵana qol jetkizilýi yqtımal» dep málimdedi. Bul soǵystyń uzaqtyǵy Ekinshi dúnıejúzilik soǵystyń tórt jylyna teńesýi múmkin ekenin kórsetedi, — dedi saıasattanýshy.
Dýbnov sanktsııalar máselesine de toqtaldy.
— Tramp ýáde etken Reseıge qarsy sanktsııalar máselesi múlde talqylanbady. Onyń ýltımatýmdary — 50-69 kún, keıin 10 kún degen merzimder aıtylǵan edi. Biraq Pýtın kezdesýge usynys jasaǵan sátte sanktsııalar taqyryby belgisiz sebeptermen keıinge ysyryp qoıyldy. Sóıtip, Tramp Pýtınniń qaqpanyna tústi. Pýtın bul qaqtyǵysty jaı ǵana toqtatýdy qalamaıdy, ol tolyq jeńis retinde kórsetýge bolatyn sheshimge umtylýda, — dedi ol.
Sarapshy Tramptyń Zelenskııdi kelissózderge qosý nıeti týraly da pikir bildirdi.
— Meniń oıymsha, Tramptyń Pýtın men Zelenskııdi bir ústelge otyrǵyzý ıdeıasy jaqyn ýaqytta júzege aspaıdy. Sebebi, Máskeý qazirgi ýkraın bıliginiń legıtımdiligine kúmán keltiredi. Pýtın qazirgi bılikpen jasalǵan kez kelgen kelisimdi mindetti dep sanamaıdy. Sondyqtan bul taǵy bir aıla, al Tramp ázirge soǵan túsip otyr, — dedi Dýbnov.
Saıasattanýshynyń paıymynsha, kelissózder áli naqty nátıje bermegen.
— Qazir bul protseste aıqyn oń stsenarıı kórinbeıdi. Pýtın ýaqytty sozyp, Máskeýge tıimdi jaǵdaı qalyptastyrýǵa umtylýda. Al Tramp ázirge sonyń oıynyna túsip otyr, — dep túıindedi Arkadıı Dýbnov.
Aıta keteıik, Aq úı Reseı men AQSh prezıdentteriniń Alıaskadaǵy kezdesýin tarıhı dep ataǵan bolatyn.
Eýroodaq basshylary Pýtın men Tramp kezdesýinen keıin birlesken málimdeme jasady.