Pýtın men Toqaev Reseı men Qazaqstan arasyndaǵy ekonomıkalyq yntymaqtastyq salalaryn talqylaıdy
ASTANA. KAZINFORM — Reseı men Qazaqstan arasyndaǵy saýda-ekonomıkalyq yntymaqtastyq kópqyrly, Reseı men Qazaqstan Prezıdentteri Vladımır Pýtın men Qasym-Jomart Toqaev onyń barlyq salalaryn kezdesý barysynda talqylaıdy, dep habarlaıdy TASS.
Bul týraly tilshilerge Reseı prezıdentiniń baspasóz hatshysy Dmıtrıı Peskov málimdedi.
— Bizdiń Qazaqstanmen saýda-ekonomıkalyq yntymaqtastyǵymyz kópqyrly, jáne ol yntymaqtastyqtyń barlyq múmkin salalaryn qamtıdy. Sondyqtan yntymaqtastyqtyń barlyq salalary mindetti túrde egjeı-tegjeıli talqylanady. Olardyń barlyǵy ózara tıimdi. Árıne, kún tártibinde basqa da taqyryptar bolady, — dedi Peskov Pýtın men Toqaevtyń «Rosneft» pen «Lýkoılǵa» qatysty jaqynda engizilgen sanktsııalardy eskere otyryp munaı-gaz salasyndaǵy yntymaqtastyqty talqylaı ma degen suraqqa jaýap bere otyryp.
Toqaevtyń Reseıge memlekettik sapary 11-12 qarashada ótedi. Kelissóz barysynda Pýtın men Toqaev saıası, saýda-ekonomıkalyq, mádenı jáne gýmanıtarlyq salalardaǵy Reseı-Qazaqstan strategııalyq seriktestigi men odaqtastyqty odan ári damytýǵa qatysty ózekti máselelerdi, sondaı-aq aımaqtyq jáne jahandyq kún tártibindegi negizgi máselelerdi talqylaıdy.
Buǵan deıin Prezıdent Qasym-Jomart Toqaev Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda Máskeýdegi saparynyń basty maqsatyna toqtaldy.