Pýtın men Lýkashenko Qazaqstan Prezıdentine kóńil aıtty
Reseı Federatsııasy men Belarýs prezıdentteri Qaraǵandy oblysyndaǵy shahtada bolǵan qaıǵyly oqıǵaǵa baılanysty Qasym-Jomart Toqaevqa kóńil aıtty, dep habarlaıdy Kazinform.
Reseı prezıdenti Vladımır Pýtın Qasym-Jomart Toqaevqa Qaraǵandy oblysyndaǵy kómir shahtasyndaǵy 33 adam qaza tapqan apatqa baılanysty kóńil aıtty.
«Qaza bolǵan kenshilerdiń otbasylaryna kóńil aıtyp, qoldaý bildiretinimizdi jetkizýińizdi suraımyn. Jer astynda qalǵan shahterler qutqarylady dep úmittenemiz», - dep jazdy TASS agenttigi.
Belarýs prezıdenti Aleksandr Lýkashenko da Qazaqstan prezıdentine kóńil aıtý jedelhatyn joldady.
«Belarýs Respýblıkasy Qazaqstannyń Qaraǵandy oblysyndaǵy kómir shahtasynda bolǵan apat saldarynan adamdardyń qaıǵyly qazasy týraly habardy kúızele qabyldady. Belarýs halqy qazaqstandyqtarmen birge basqa túsken qıyndyq pen orny tolmas qazanyń qaıǵysyn bólisedi», - dep jazdy Belarýstiń Belta agenttigi.
