Pýtın men Erdoǵan Astanadaǵy kezekti kelissózder qarsańynda Sırııa máselesin talqylady

ASTANA. QazAqparat - Reseı basshysy Vladımır Pýtın Túrkııa Prezıdenti Redjep Taıyp Erdoǵanmen telefon arqyly sóılesti. Áńgime barysynda memleket basshylary birlesken iri energetıkalyq jobalardyń iske asyrylýyn qosa alǵandaǵy jemisti ekijaqty yqpaldastyqtyń túrli aspektileri boıynsha tyńǵylyqty pikir almasty, dep habarlaıdy QazAqparat Kremldiń baspasóz qyzmetine silteme jasap.

Taraptar sondaı-aq 30-31 qazan kúni Astanada ótetin Sırııa boıynsha jetinshi halyqaralyq kezdesýdiń (Astana protsesi) qarsańynda deeskalatsııa aımaqtarynyń jumys isteýin qamtamasyz etý, lańkestikpen kúres jáne Sırııa Arab Respýblıkasynda saıası retteý protsesin alǵa jyljytý boıynsha kúsh-jigerdi jetildirýdiń mańyzdylyǵyn atap ótti.

Budan bólek, Vladımır Pýtın Redjep Taıyp Erdoǵandy 29 qazan kúni Túrkııada atap ótiletin ulttyq mereke - Respýblıka kúnimen quttyqtady.

Prezıdentter jeke baılanystardy jalǵastyrýǵa ýaǵdalasty.

Aıta keteıik, buǵan deıin Qazaqstannyń Syrtqy ister mınıstrliginen habarlaǵandaı, 30-31 qazan kúnderi ótetin Astana protsesiniń kezekti raýndyna barlyq múddeli taraptar qatysatyn bolady. 

Reseı delegatsııasyna RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegatsııasyna syrtqy ister mınıstriniń orynbasary Sedat Onal, Iran delegatsııasyna syrtqy ister mınıstriniń orynbasary Hýseın Djaberı Ansarı basshylyq etedi.

«Aldaǵy kezdesýge Sırııa úkimetiniń jáne sırııalyq oppozıtsııanyń, sondaı-aq baıqaýshy retinde BUU, AQSh jáne Iordanııanyń ókilderi qatysady. Іs-sharanyń bastalýyna bir kún deıin kepilger-elderdiń ókilderi sarapshylar deńgeıinde ekijaqty jáne úshjaqty konsýltatsııalar ótkizýge nıetti. Jalpy otyrys barlyq taraptyń qatysýymen 31 qazanda ótedi» delingen mınıstrliktiń baspasóz málimetinde.

Vedomstvanyń habarlaýyna qaraǵanda, kezdesý Sırııada urys is-qımyldaryn doǵarý rejımin nyǵaıtý boıynsha qol jetkizilgen nátıjelerdi saqtaýǵa, sondaı-aq daǵdarysty saıası retteýge ótý kezeńinde atalǵan eldegi jaǵdaıdy ári qaraı turaqtandyrý sheńberinde kúsh-jigerlerdi arttyrýǵa baǵyttalǵan.  

Foto: gazeta.ru