Pýtın men Álıev Bakýde prezıdentterdiń birlesken deklaratsııasyna qol qoıdy

ASTANA. KAZINFORM – 19 tamyzda Bakýde Vladımır Pýtın men Ázerbaıjan Respýblıkasynyń prezıdenti Ilham Álıevtiń kelissózderi ótip, onyń qorytyndysy boıynsha kóshbasshylar birqatar memleketaralyq qujattarǵa qol qoıdy.

Ázerbaıjan BAQ habarlaýynsha, prezıdentterdiń qatysýymen qol qoıylǵan úkimetaralyq jáne basqa da qujattar almasyldy. Qol qoıylǵan alty qujattyń ishinde úsh kelisim men úsh memorandým, sondaı-aq birlesken málimdeme bar.

«Búgin qabyldanǵan qujattar, sonyń ishinde, eń aldymen, prezıdentterdiń Birlesken deklaratsııasy bizdiń qarym-qatynastarymyzdyń dostyq jáne odaqtastyq sıpatyn taǵy bir ret rastaıdy. 2022 jyldyń aqpanynda qol qoıylǵan Odaqtastyq yntymaqtastyq týraly Deklaratsııanyń erejeleri sátti júzege asyrylyp otyr. Bizdiń elder odaqtas, dos, jaqyn seriktes jáne kórshi retinde áreket etýde», - dedi Ázerbaıjan prezıdenti Ilham Álıev reseılik áriptesi Vladımır Pýtınmen kelissózder qorytyndysy boıynsha baspasózge bergen birlesken málimdemesinde.

Birlesken málimdemeden bólek azyq-túlik qaýipsizdigi salasyndaǵy yntymaqtastyq, karantın jáne ósimdikterdi qorǵaý salasyndaǵy yntymaqtastyq, densaýlyq saqtaý, medıtsınalyq bilim jáne ǵylym salasyndaǵy yntymaqtastyq týraly úkimetaralyq kelisimderge qol qoıyldy.

Sondaı-aq eńbek ınspektsııasy máseleleri, klımattyń ózgerýi máseleleri, sondaı-aq Reseıdiń tikeleı ınvestıtsııalar qory men Ázerbaıjannyń Eksport pen ınvestıtsııalardy yntalandyrý agenttigi arasynda ózara túsinistik týraly memorandýmdarǵa qol qoıyldy.

Qol qoıý rásimi Ázerbaıjan prezıdentiniń Zagýlba rezıdentsııasynda ótti.