Pýtın: Qazaqstanmen qarym-qatynasty damytýda eshqandaı qıyndyq joq

ASTANA. KAZINFORM — Reseı Prezıdenti Vladımır Pýtın Sankt-Peterbýrg halyqaralyq ekonomıkalyq forýmy aıasynda álemdik jetekshi aqparat agenttikteri basshylarymen kezdesýde Qazaqstan men Reseı arasyndaǵy erekshe qarym-qatynas jaıly pikir bildirdi, dep habarlaıdy Kazinform tilshisi.

— Bizde Qazaqstanmen erekshe qarym-qatynas bar. Bul aıqyn, muny bári jaqsy túsinedi. Bul – odaqtastyq qarym-qatynas sózdiń týra maǵynasynda. Ortaq tarıhymyz, bir memlekettiń quramynda bolǵanymyz, adamdar arasyndaǵy jeke ári gýmanıtarlyq deńgeıdegi tereń baılanystar — munyń bári asa mańyzdy, — dedi V. Pýtın.

Memleket basshysy Qazaqstannyń UQShU, Eýrazııalyq ekonomıkalyq odaq jáne Shanhaı yntymaqtastyq uıymy syndy irgeli ıntegratsııalyq birlestikterdiń múshesi ekenin aıtyp, bul faktor ekijaqty baılanystardy nyǵaıtýǵa yqpal etip otyrǵanyn atap ótti.

— Bul biz úshin asa mańyzdy baǵyttaǵy ózara is-qımyldy damytýǵa jaǵdaı jasaıdy. Qazaqstan men Reseı arasyndaǵy shekara — álemdegi eń uzyn qurlyqtyq shekara. Bul da eleýli faktor. Osy turǵydan alǵanda da biz yntymaqtastyqty jalǵastyramyz, — dedi Reseı Prezıdenti.

Ol Qazaqstanmen qarym-qatynasta eshqandaı kedergi kórip turmaǵanyn aıryqsha atap ótti.

— Taǵy da atap ótkim keledi: Qazaqstan – biz úshin eń jaqyn memleketterdiń biri. Bul — bizdiń odaqtasymyz. Qarym-qatynastarymyzdyń damýyna kedergi keltiretin eshqandaı másele kórip turǵanym joq, tipti eshqandaı, — dedi V. Pýtın.

Sondaı-aq, ol Máskeý men Astana yntymaqtastyqtyń jańa baǵyttaryn izdestirýdi jalǵastyratynyn aıtty.

— Biz Qasym-Jomart Kemelulymen únemi kezdesip turamyz. Ol bizge keledi, men de Qazaqstanǵa úlken yqylaspen baramyn. Úkimet, mınıstrlikter, sonyń ishinde Syrtqy ister mınıstrlikteri deńgeıinde keńes berý jáne ózara is-qımyl úzdiksiz júrip jatyr, — dep túıindedi Reseı Prezıdenti.

Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly pikir bildirgen bolatyn.