Pýtın Qazaqstanǵa saparmen keledi – Muhtar Tileýberdi

NUR-SULTAN. QazAqparat – Reseı Prezıdenti Vladımır Pýtın Azııadaǵy ózara is-qımyl jáne senim sharalary keńesine qatysý úshin Qazaqstanǵa keledi. Bul týraly QR Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.

«Reseı Prezıdenti Azııadaǵy ózara is-qımyl jáne senim sharalary keńesine qatysý úshin Qazaqstanǵa keledi. Sonymen qatar Táýelsiz Memleketter dostastyǵy memleket basshylarynyń keńesin ótkizý josparlanǵan. Biz, Reseı Prezıdenti qatysady dep kútemiz. Ol qazan aıynyń ortasynda bolady. Resmı rastaýyn kútip otyrmyz. Memleket basshysynyń árbir saparynda ekijaqty kezdesý ótkiziledi», - dedi Muhtar Tileýberdi elordada ótip jatqan Álemdik jáne dástúrli dinder lıderleriniń VII sezi aıasynda BAQ ókilderiniń saýalyna oraı.

Sonymen qatar ol Qazaqstan qaıtalama sanktsııaǵa tap bolmaıtyndyǵyn atap ótti.

«Bizde antıreseılik sanktsııanyń teris yqpalyn, onyń ishinde qaıtalama sanktsııany ekonomıkamyzǵa jibermeý jónindegi úkimettik jumys toby qurylǵan. Jumys toby jemisti jumys istep, eýropalyq komıssııamen, AQSh ákimshiligimen turaqty konsýltatsııa júrgizedi», - dedi ol.

Foto:© Mıhaıl Mettsel/TASS