Pýtın Qazaqstanǵa memlekettik saparmen keledi

MÁSKEÝ. KAZINFORM – Qazaqstan Prezıdenti Qasym-Jomart Toqaev Reseı Prezıdenti Vladımır Pýtındi kelesi jyly elimizge memlekettik saparmen kelýge shaqyrdy.

- Zor rızashylyqpen Sizdi kelesi jyly Qazaqstanǵa memlekettik saparmen kelýge shaqyramyn. Durys aıttyńyz, másele protokoldyq naqtylyq jaıynda emes, shyn máninde. Biz eń joǵary deńgeıde qujattardyń jańa býynyna qol qoıýǵa jáne onyń durys iske asyrylýyn baqylaýǵa tıispiz. Bul asa mańyzdy, - dedi Qasym-Jomart Toqaev.

Osy kezeginde Reseı basshysy Qazaqstan Prezıdentiniń shaqyrýyn qabyl aldy.

- Qazaqstanǵa zor rızashylyqpen kelemin, - dedi Vladımır Pýtın.

Aıta keteıik, Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy.

Memlekettik shekaradan ótken sátten Máskeý áýejaıyna qonǵanǵa deıin Reseıdiń áýe keńistiginde Qazaqstan Prezıdentiniń bortymen birge RF Qorǵanys mınıstrliginiń Sý-35 ushaqtary qaptaldasyp ushty.

Sapar barysynda Qazaqstan men Reseı prezıdentteri beıresmı kezdesý ótkizdi.

Qasym-Jomart Toqaev pen Vladımır Pýtınniń beıresmı pikiralmasýy keshki as ústinde jalǵasty.

Prezıdent «Belgisiz jaýynger beıiti» eskertkish memorıalyna gúl shoǵyn qoıyp, Reseı Federaldy Jınalysy Federatsııa keńesiniń tóraǵasymen kezdesti.

Sondaı-aq Kremlde Qasym-Jomart Toqaevty resmı qarsy alý rásimi ótkeni týraly jazdyq.