Pýtın Qazaqstan men Qyrǵyzstannan EAEO tańbalanbaǵan taýarlaryn tasýǵa ruqsat berdi
ASTANA. KAZINFORM — Reseıge Qazaqstan men Qyrǵyzstannan Eýrazııalyq Ekonomıkalyq Odaqtyń tańbalanbaǵan taýarlaryn tasýǵa ruqsat berildi. Reseı prezıdenti Vladımır Pýtın Jarlyqqa qol qoıdy, dep habarlaıdy TASS.
Jarlyq bıylǵy jyldyń 10 jeltoqsanyna deıin jaramdy.
Qujatqa sáıkes, reseılik zańdy tulǵalar mundaı taýarlardy Eýrazııalyq ekonomıkalyq odaqtyń (EAEO) ónimi mártebesin rastaıtyn qujattarsyz, sondaı-aq tańbalaýsyz nemese Odaq jáne Reseı Federatsııasynyń zańnamasynda talap etiletin basqa da málimettersiz ımporttaı alady.
Alaıda, kedendik erejeler men ónimdi tańbalaý talaptaryn buzbaý úshin belgili bir sharttar saqtalady.
Mindetti sharttarǵa mynalar jatady:
- reseılik alýshylar taýarlardy tasymaldaýdy jáne ýaqytsha saqtaýdy qamtamasyz etýi;
- ımport týraly Indýstrııa jáne saýda mınıstrligine habarlaý;
- qajetti belgilerdi keıinnen qoldaný.
Mundaı taýarlar qoldanystaǵy kedendik erejelerge sáıkes 27 jeltoqsanǵa deıin deklaratsııalanýy tıis. Indýstrııa jáne saýda mınıstrligi taýarlar týraly aqparatty memlekettik aqparattyq júıege engizýge mindetti.
Esterińizge sala keteıik, Eýrazııalyq Ekonomıkalyq Odaq tańbalaý boıynsha pılottyq joba júrgizdi. Baǵdarlama taýarlardyń qozǵalysyn qosymsha rásimdersiz qadaǵalaýǵa jáne olardyń shyqqan jerin rastaýǵa múmkindik beredi.
Aıta keteıik, 2026 jyldyń 11 aqpanynan bastap Eýrazııalyq Ekonomıkalyq Odaq aýmaǵynda navıgatsııalyq plombalardy paıdalana otyryp jóneltilimderdi qadaǵalaý júıesi iske qosylady.