Pýtın Toqaevqa qazaqstandyq áskerı qyzmetshilerdiń qaza bolýyna baılanysty kóńil aıtty
ASTANA. KAZINFORM — Reseı Prezıdenti Vladımır Pýtın Qazaqstan Prezıdenti Qasym-Jomart Toqaevqa Kaspıı teńizinde bolǵan qaıǵyly oqıǵa saldarynan qazaqstandyq áskerı qyzmetshilerdiń qaza bolýyna baılanysty kóńil aıtty. Bul týraly Kremldiń baspasóz qyzmeti málim etti.
Reseı basshysy joldaǵan jedelhatta qaza tapqan áskerı qyzmetshilerdiń týǵan-týystary men jaqyndaryna qaıǵyryp kóńil aıtatynyn jetkizgen.
— Qurmetti Qasym-Jomart Kemeluly! Qazaqstan Áskerı-teńiz kúshteriniń Kaspııdegi oqý-jattyǵýlary barysynda bolǵan qaıǵyly oqıǵaǵa baılanysty shyn júrekten kóńil aıtamyn. Qaza tapqan áskerı qyzmetshilerdiń týǵan-týystaryna shynaıy janashyrlyǵym men qoldaýymdy jetkizýińizdi suraımyn. Reseı halqy olardyń qaıǵysy men qasiretin bólisedi, – delingen Vladımır Pýtınniń jedelhatynda.
Jedelhat Qazaqstan Prezıdentine 25 qyrkúıekke qaraǵan túni joldanǵan.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Qylmystyq kodekstiń 453-babynyń 2-bóligi – «Aýyr zardaptarǵa ákep soqqan qyzmetke salǵyrt qaraý» jáne 465-baby – «Keme júrgizý qaǵıdalaryn buzý» boıynsha qylmystyq is qozǵaldy.
