Pýtın Grýzııamen arada áýe qatynasy arqyly jolaýshylar tasymaldaýǵa tyıym saldy
MÁSKEÝ. QazAqparat - RF Prezıdenti Vladımır Pýtın juma kúni Grýzııaǵa jolaýshy tasymaldaıtyn áýe qatynasyna tyıym salatyn Jarlyqqa qol qoıdy. Tyıym 8 shildeden bastap kúshine enedi. Bul týraly Kreml baspasóz qyzmetine silteme jasap TASS agenttigi habarlady.
«2019 jyldyń 8 shildesinen bastap reseılik áýe kompanııalarynyń azamattardy Reseı Federatsııasynyń aýmaǵynan Grýzııa aýmaǵyna tasymaldaýyna (sonyń ishinde kommertsııalyq) ýaqytsha tyıym salynady», - delingen qujatta.
Jarlyq mátininde týrıstik agenttikter men týroperatorlaryna tyıym kúshinde turǵan ýaqytta azamattarǵa týrıstik ónimderdi satpaýǵa keńes berilgen.
Pýtın RF úkimetine ýaqytsha Grýzııada júrgen reseılik azamattardyń Otanyna qaıtý sharalaryn qarastyrýdy tapsyrdy.
Qujatta aıtylǵandaı, Jarlyqqa «Reseı Federatsııasynyń ulttyq qaýipsizdigin, Reseı Federatsııasy azamattaryn qylmystyq jáne basqa da quqyqqa qaıshy áreketterden qorǵaý maqsatynda» qol qoıylǵan.
Aıta keteıik beısenbi, 20 maýsym kúni Reseı delegatsııasy Pravoslavıe parlamentaralyq Bas assambleıasyna qatysqan bolatyn. Delegatsııany basqarýshy jáne ASM basshysy RF memlekettik dýmasynyń depýtaty Sergeı Gavrılovtyń sessııa kezinde Grýzııa parlamenti spıkeriniń kreslosyna otyryp, jınalǵandarǵa orys tilinde sóılegeni oppozıtsııanyń narazylyǵyn týdyrdy. Grýzııanyń oppozıtsııalyq depýtattary muny qorlaý dep baǵalap narazylyqtaryn bildirip, Bas assambleıanyń jumysyn toqtatty. Narazylyq bildirýshiler Parlament ǵımaratyna shabýyldady.
