Pýtın: EAEO elderi biryńǵaı energetıkalyq naryqqa áli daıyn emes, biraq biz soǵan bara jatyrmyz

ASTANA. KAZINFORM — Reseı Prezıdenti Vladımır Pýtın Eýrazııalyq ekonomıkalyq odaqty (EAEO) burynǵy Keńes odaǵy keńistigindegi eń tereń ıntegratsııalanǵan birlestik dep atady, dep habarlaıdy Kazinform tilshisi.

— Bul qurylym sóz júzinde emes, is júzinde ıntegratsııalanǵan. Bir kezderi Qazaqstan EAEO qurý bastamasyn kóterdi, bul úshin biz dostarymyzǵa alǵys aıtamyz. Qazir bul uıym damyp keledi. Árıne, bári birkelki, ońaı bola bermeıdi. Múmkin, energetıka salasynyń keıbir baǵyttary boıynsha áli tolyq biryńǵaı naryq qurýǵa daıyn emes shyǵarmyz. Biraq biz soǵan bara jatyrmyz. Biz báribir bul maqsatqa jetemiz. Munda eshqandaı kúmán joq. Másele – ýaqyt pen qarqynǵa baılanysty, — dedi Vladımır Pýtın Belarýs BAQ ókili qoıǵan suraqqa jaýap bere otyryp.

Sondaı-aq ol EAEO elderi arasynda energııa resýrstaryn jetkizý boıynsha turaqty túrde talqylaýlar júrip jatqanyn aıtty.

— Biz bul máselelerde jol taba alamyz. Keıde, tipti óte tyń ári erekshe sheshimderge de kelip jatamyz. Aldaǵy ýaqytta da solaı bolatynyna senimdimin, — dedi Reseı Prezıdenti.

Aıta keteıik, osy jıynda Qazaqstan men Reseı arasyndaǵy taýar aınalymynyń 95%-ǵa jýyǵy ulttyq valıýtalarmen júzege asyrylatyny aıtyldy.

Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly aıtty.

Sondaı-aq Qazaqstanmen qarym-qatynasty damytýda eshqandaı qıyndyq joq ekenin jetkizdi.

Reseı Prezıdenti UQShU qyzmetiniń eshqashan úshinshi elderge qarsy baǵyttalmaǵanyn málimdedi.

Reseı Qazaqstanmen energetıkalyq yntymaqtastyqty keńeıtýdi kózdep otyr.