Pýtın Amýr jolbarystaryn Qazaqstanǵa berýdiń maqsatyn túsindirdi
ASTANA. KAZINFORM – Reseı Prezıdenti Vladımır Pýtın Qazaqstanǵa Amýr jolbarystaryn berý bastamasynyń maqsaty tabıǵatty qalpyna keltirý jáne sırek kezdesetin janýarlar túrlerin saqtaý ekenin aıtty.
Qazaqstanǵa jasaǵan memlekettik saparynyń qorytyndysy boıynsha jýrnalısterdiń suraqtaryna jaýap bergen Reseı basshysy bul jobanyń gýmanıtarlyq ári ekologııalyq mańyzǵa ıe ekenin atap ótti.
– Negizgi máni – bizdiń gýmanıtarlyq saladaǵy yntymaqtastyǵymyzda. Biz úshin tabıǵatty qalpyna keltirý máselesi asa mańyzdy. Faýnany qalpyna keltirý baǵytyndaǵy áriptesterimizdiń kúsh-jigerin qoldaýǵa daıynbyz, – dedi Vladımır Pýtın.
Onyń aıtýynsha, mundaı bastamalar qorshaǵan ortany qorǵaý jáne bıoalýantúrlilikti qalpyna keltirý salalaryndaǵy memleketaralyq yntymaqtastyqtyń mańyzdy bóligi sanalady.
Reseı Prezıdenti sırek kezdesetin janýarlardy qorǵaý men tabıǵı ekojúıelerdi qalpyna keltirý eki el arasyndaǵy ekologııalyq áriptestikti nyǵaıtýǵa yqpal etetinin atap ótti.
Buǵan deıin Qasym-Jomart Toqaev Qazaqstanǵa Amýr jolbarystarynyń jetkizilýin shyn máninde ıgi jumys dep baǵalaǵan.
