Pýtın Alıaskadaǵy sammıtke daıyndyq jóninde keńes ótkizdi

ASTANA. KAZINFORM — Reseı Prezıdenti Vladımır Pýtın 15 tamyzda ótetin Reseı–AQSh sammıtine daıyndyq aıasynda eldiń joǵarǵy basshylyǵy, Úkimet jáne Prezıdent ákimshiligi ókilderimen keńes ótkizdi, dep habarlaıdy TASS. 

Bul týraly jýrnalısterge memleket basshysynyń baspasóz hatshysy Dmıtrıı Peskov málimdedi.

Vnýkovo áýejaıynan Ankorıdj qalasyndaǵy (Alıaska) Elmendorf–Rıchardson áskerı bazasyna arnaıy Il-96 ushaǵy ushyp shyqty. TASS dereginshe, bortta Vladımır Pýtın men Donald Tramp arasyndaǵy sammıtti uıymdastyratyn aldyn ala daıyndyq toby bolýy múmkin.

14 tamyzda Ankorıdjge Reseıdiń sammıtti jarııalaıtyn, AQSh vızasyn alǵan jýrnalısteri de barady.

Aq úıdiń habarlaýynsha, Donald Tramp juma kúni tańerteń Pýtınmen kezdesý úshin Alıaskaǵa ushady. Aq úı baspasóz hatshysy Kerolaın Lıvıttiń aıtýynsha, eki el basshylarynyń kelissózderinen keıin AQSh jáne Reseı delegatsııalary qatysatyn birlesken túski as, odan soń Tramp pen Pýtınniń ortaq baspasóz máslıhaty ótedi.

Buǵan deıin Alıaskadaǵy kelissózderge qatysatyn Reseı jáne AQSh delegatsııalarynyń quramy jarııalanǵan bolatyn.