Pýtın AQSh saılaýynda Kamala Harrısti qoldaıtynyn aıtty

ASTANA. KAZINFORM — Osy aptada Reseı prezıdenti Vladımır Pýtın AQSh-taǵy prezıdent saılaýyna qatysty pikir bildirip, Kamala Harrıstiń kandıdatýrasyn qoldaıtynyn aıtty, dep jazady New York Post.

Vladıvostoktaǵy Shyǵys ekonomıkalyq forýmyna qatysqan Reseı basshysy AQSh-taǵy prezıdent saılaýyna qatysty suraqqa jaýap berdi.

— Birinshiden, Baıden barlyq jaqtastaryna Harrıs hanymdy qoldaýdy usyndy. Buǵan deıin biz úshin Baıden tańdaýly kandıdat ekenin aıtqan bolatynbyz. Endi biz onyń aıtqanyn oryndaımyz, ony qoldaımyz. Ekinshiden, ol rııasyz kúle alady. Bul onyń jaqsy adam ekenin bildiredi. Tramp basqa prezıdentterge qaraǵanda Reseıge qarsy kóbirek sanktsııa saldy, eger Harrıs jaqsy adam bolsa, onda ol mundaı áreketterden bas tartýy múmkin, -dedi V.Pýtın.

Harrıs-Ýoltstyń shtaby Pýtın «qoldaýynan» bas tartty.

Kremldiń baspasóz hatshysy Dmıtrıı Peskov ta turaqtylyq úshin Máskeý Trampqa qaraǵanda Harrısti jaqtaıtynyn bildirdi.

78 jastaǵy Donald Tramp saılaý naýqany kezinde 59 jastaǵy Kamala Harrısti qatty kúlgeni úshin birneshe ret keleke etken. 

Lıberaldy synshylardyń ózin Reseıge tym jaqyn dep aıyptaǵanyna qaramastan, Donald Tramp Ýkraınadaǵy qaqtyǵysqa deıin de Reseıge AQSh-tyń eń qatań sanktsııalaryn saldy.

Tramp saılaýda jeńiske jetse, Reseı men Ýkraına arasyndaǵy bitimgershilik kelisimge qol jetkizýge kúsh salatynyn ashyq aıtty, sondaı-aq Amerıkanyń Kıevke kómek kórsetýine kúmánmen qaraıtynyn bildirdi.

Sársenbi kúni AQSh Ádilet mınıstrligi Reseıdiń AQSh-tyń ishki saıasatyna yqpal etý úshin keń aýqymdy naýqan júrgizip jatqanyn, onyń ishinde 10 mıllıon dollarlyq úgit-nasıhat shemasy bar ekenin málimdedi.