Pýsanda Qazaqstan azamaty qaıtys boldy
«Bizdiń bul málimetten habarymyz bar. Ol syrqattan kóz jumdy. Koreıadaǵy Qazaqtan elshiliginiń málimetine sáıkes 21 aqpanda elshiliktiń konsýldyq bólimine QR azamaty - onyń kúıeýi kelip, óz jubaıynyń qaıtys bolǵanyn memlekettik tirkeýge engizýdi ótindi. Ol Pýsanda biraz ýaqytqa sozylǵan aýrýdan kóz jumǵan», - dedi QR SІM resmı ókili Aıbek Smadııarov vedomstvoda ótken baspasóz máslıhatynda.
Aıbek Smadııarov sonymen qatar konsýldyq tarapynan birden memlekettik qyzmet kórsetilgenin aıtyp ótti.
«25 aqpan kúni elshilik qaıtys bolǵan áıeldiń kúıeýinen jergilikti klınıkaǵa medıtsınalyq qyzmet úshin 15 mıllıon koreılik von, ıaǵnı 40 myń dollar bólý týraly taǵy ótinish tústi. QR azamattarynyń qaryzyn jabý úshin shekaradan tys mekemeler men SІM-de qarajat qarastyrylmaıdy. Alaıda atalǵan otbasynyń qarjylyq qıyndyǵyn eskere otyryp, elshilik klınıkaǵa jeńildik berýdi ótinip, hat joldady. Shetelge emdelýge ketken bizdiń kóptegen azamat emdelmes buryn klınıkamen kelisimge keledi. Ol kelisimde taraptardyń mindettemeleri naqty jazylady. Olar bul mindettemelerdi qatań saqtap, shamasy jetkenshe oryndaýy kerek», - dedi Aıbek Smadııarov.
