Pýlıtser syılyǵynyń eki dúrkin ıegeri Pol Salopek Qazaqstanǵa keldi
ASTANA. QazAqparat - Pýlıtser syılyǵynyń eki dúrkin ıegeri Pol Salopek «Álemdik serýen» atty jobasy aıasynda Qazaqstanǵa keldi. Shetel jýrnalısi ári zertteýshisi qazaqstandyq ǵalymdarmen kezdesti. Bul kezdesýge AQSh ǵalymy Aleksandr Moen de qatysty.
«Men ózimniń serýenimdi 2013 jyldyń qańtar aıynda Efıopııa elinen bastadym. Genetıkalyq zertteýler men arheologııalyq qazba jumystary barysynda tabylǵan eskertkishterdi taldaý barysynda anyqtalǵanyndaı, Adamzattyń tamyry Afrıka elinen bastaý alady jáne ary qaraı Jer sharyn qonystana bastaǵan. Men babalarymyzdyń sol jolymen - Afrıkadan Ońtústik Amerıkaǵa deıin júrip ótpekpin. Meniń serýenim 33 myń shaqyrymǵa sozylady. Bul orta eseppen 35 mıllıon qadamǵa teń», - deıdi P.Salopek.
«Álemdik serýen» jáne «Genography» jobalaryna jetekshilik etip kele jatqan ǵalym Jerdi 10 jylda sharlap ótýdi kózdep otyr.
«Eń basynda bizdiń josparymyz boıynsha, men buǵan 7 jyl ýaqytymdy jumsaý kerek bolǵanmyn, biraq qazirgi jaǵdaılardy eskeretin bolsaq, men buǵan 10 jyl jumsaıtyn sııaqtymyn. Meniń basty maqsatym - tarıhtaǵy ártúrli oqıǵalardy baıandaý. Men osy serýen barysynda kezdestirgen adamdardan estigen oqıǵalarymdy aıtyp otyratyn bolamyn. Sonymen qatar halyqaralyq jańalyqtarda jergilikti turǵyndardyń qazirgi ahýaly týraly habarlaýǵa da tyrysamyn. Máselen, men jolda sırııalyq bosqyndardyń údere kóship jatqan kezderin kórdim. Soǵystyń kesirinen adamdar bir elden ekinshi elge kóshýge májbúr. Men qazirgi ýaqytta osyny jazyp jatyrmyn», - dedi AQSh tilshisi.
Ǵalym Qazaqstanǵa Kavkaz elderi, Ázerbaıjan jeri arqyly kelip otyr.
«Men Qazaqstanǵa Kaspıı arqyly keldim. Batys Qazaqstannyń Mańǵystaý óńirine aıaq basqan sátterim fotoqujatqa enip otyr. Qazaqstan óte ádemi jer jáne adamdary da óte sulý. Tabıǵatyna sóz jetpeıdi», - dep atap ótti ol.
Aıta keteıik, atalǵan kezdesý «National Geographic Qazaqstan» jýrnalynyń tuńǵysh ret qazaq tilinde jaryq kórýine baılanysty oraılastyrylǵan bolatyn.
Jýyrda aty álemge áıgili «National Geographic» jýrnalynyń qazaqtildi nusqasy jaryqqa shyqqanyn bilesizder. «National Geographic» álemniń eń tanymal baspa ónimi sanalady. Saıasat taqyrybynan tys, shyǵý tarıhy sonaý 1888 jyldan bastalatyn basylym búginde álemniń 38 tilinde, 80-nen astam memleketke taralady.
Jýrnaldyń negizgi maqsaty - Qazaqstandaǵy geografııalyq jańalyqtar men osy saladaǵy eleń etkizer tyń jańalyqtarǵa álem týrısteriniń nazaryn aýdartý. Elimizdiń sulý tabıǵatyn, tarıhı oryndaryn, kórikti jerlerin, ósimdikter dúnıesi men janýarlar álemin búkil álemge tanystyrý. Qazaqstannyń ımıdjin arttyrý. Sol arqyly taıaý ýaqyttarda elimizge kelgisi keletin týrıster sanynyń artýyna úles qosý. Sondaı-aq, Qazaqstan dalasynyń ádemiligi men ósimdikter, jan-janýarlar dúnıesiniń alýandyǵyn nasıhattaý. Osynyń bári qyzyqty fotosýretter men maqalalar túrinde oqyrmandar nazaryna usynylady. Redaktsııanyń josparynda aldaǵy ýaqyttarda elimizdiń tabıǵaty ásem jerlerine foto-vıdeo ekspedıtsııalar uıymdastyrý da bar.
