Pýerto-Rıkoǵa daýyl tónip tur: Tramp tótenshe jaǵdaı jarııalady
Bul jóninde The Weather Channer tilshisi Raıan Sloan Twitter-de jarııalaǵan Aq úıdiń baspasóz baıanynda atap ótilgen.
«Prezıdent Donald Tramp Pýerto-Rıkoda tótenshe jaǵdaı ornaǵanyn málim etip, federaldyq jáne jergilikti vedomstvolarǵa «Dorıan» tropıkalyq daýylynyń saldaryn joıýǵa kómektesýge tapsyrma berdi», - delingen habarlamada.
Sondaı-aq, Tramp AQSh Tótenshe jaǵdaılar basqarmasy jónindegi federaldyq agenttikti tabıǵı apatqa baılanysty jergilikti halyqqa kómektesýge baǵyttalǵan barlyq kúshterdiń úılestirýshisi etip taǵaıyndady.
Daýyl aralǵa jaqyndaǵan sátte kúsh jınap alapat quıynǵa aınalady dep kútilýde. Jergilikti turǵyndar 2017 jyly bolǵan «Marııa» daýylynyń ákelgen aýyr zardaptaryn áli de umytqan joq. Ol kezde 300 adam kóz jumǵan edi, dep habarlaıdy euronews.com.
Pýerto-Rıkoda jáne kórshiles Domınakana Respýblıkasynda tótenshe jaǵdaı jarııalandy.
Adamdar kólikterine janarmaı quıyp, barlyq qajetti zattardy, sonyń ishinde generatorlardy satyp alyp jatyr.
Sınoptıkterdiń málimetinshe, aptanyń aıaǵyna qaraı surapyl daýyl Bagam araldary men Florıdaǵa jetip qalýy múmkin.
