Pýerto-Rıkoda 1,4 mln adam jaryqsyz qaldy

ASTANA. KAZINFORM — Luma Energy kompanııasynyń ókili Ýgo Sorrentını Pasha merekesi qarsańynda týrıster aǵylyp jatqan Pýerto-Rıkodaǵy elektr energııasynyń óshýine qatysty málimdeme jasady, dep jazady Anadoly.

Onyń aıtýynsha, jaryq tek turǵyn úılerde ǵana emes, áýejaılarda jáne keıbir aýrýhanada da joq.

Sorrentınıdiń sózinshe, shamamen 330 myń adam aýyzsýǵa qol jetkizýde qıyndyq bolyp otyr. Elektr jelilerin qalpyna keltirý jumystary jalǵasyp jatqanymen, aqaýdyń naqty sebebi áli anyqtalǵan joq. Elektr energııasynyń óshýi Pýerto-Rıkoda shamamen 1,4 mıllıon adamnyń ómirine keri áserin tıgizdi.

Jergilikti bılik zardap shekkenderdiń shaǵymdary 72 saǵat ishinde qaralatynyn habarlaǵan.

Pýerto-Rıko gýbernatory Djennıfer Gonsales eldi aýqymdy túrde jaryqsyz qaldyrǵan Luma Energy kompanııasymen jasalǵan kelisimdi buzý máselesi qaralyp jatqanyn da málimdedi.

Aıta keteıik, Shrı-Lankada maımyl elektr stantsııasyna kirip ketip, eldi jaryqsyz qaldyrǵanyn jazǵan edik.