Pýerto-Rıko jaǵalaýynda keme aýdarylyp, eki adam qaza tapty
ASTANA. KAZINFORM — AQSh-qa qaraıtyn Pýerto-Rıko aýmaǵyndaǵy Mona araly mańynda qoldan jasalǵan keme aýdarylyp, eki adam qaza tapty. Bul týraly AQSh jaǵalaý kúzeti habarlady, dep jazady Report.
Qutqarý qyzmetiniń málimetinshe, bortynda shamamen 60 adam bolǵan kemede tóbeles bastalǵan. Mona aralynan shamamen 16 shaqyrym qashyqtyqta turǵan keme aýdarylyp, jaǵalaý kúzeti 40 adamdy qutqaryp úlgergen.
— Eki adamnyń denesi tabyldy. Qutqarý operatsııasy jalǵasyp jatyr, — delingen habarlamada.
Kýágerlerdiń aıtýynsha, tóbeles kezinde birneshe adam pyshaqtalǵan. Keıbiri oqıǵa kezinde sýǵa sekirip, aralǵa qaraı júzgen. Kemedegi jolaýshylardyń eshqaısysy qutqarý keýdeshesin kımegen.
Eske salaıyq, Kıpr jaǵalaýynda 267 jolaýshy otyrǵan keme aýdarylyp, 7 adam qaza tapqan bolatyn.
