Pýchchınıdiń sońǵy jumbaǵy: Elorda teatry Týrandotty jańa qyrynan kórsetti
ASTANA. KAZINFORM — Djakomo Pýchchınıdiń eń sońǵy, eń kúrdeli ári eń aýqymdy týyndysy — «Týrandot» operasy elorda sahnasyna qaıta oraldy. Sahnadaǵy jańbyr, aıdahardyń aýzynan shyǵatyn ımperator jáne ǵaryshtyq beıneler kórermendi birden baýrap alady. Biraq bul tehnıkalyq effektilerdiń artynda adam janyn tebirenter úlken mahabbat pen psıhologııalyq drama jatyr.
Teatr solısi Sargıs Bajbeýk-Melıkıannyń aıtýynsha, spektakldiń tehnıkalyq múmkindikteri tańǵaldyrmaı qoımaıdy.
Stsenografııadaǵy ekrandar men ǵarysh kórinisteri klassıkalyq operaǵa múldem bóten sııaqty kóringenimen, is júzinde bul sheshim Pýchchını mýzykasynyń asqaqtyǵyn odan saıyn asha túsken.
Bul qoıylymnyń basty júgi men jaýapkershiligi teatrdyń jetekshi solısi Bıbigúl Januzaqtyń ıyǵynda.
Óner ıesi bul kúrdeli partııanyń qyr-syryn meńgerý úshin uzaq ýaqyt boıy izdengenin aıtady.
— Men bul rólge 6 jyl boıy daıyndaldym desem de bolady. Bul jerde tek daýystyń múmkindigi azdyq etedi, eń bastysy — psıhologııalyq daıyndyq. Muzdaı sýyq hanshaıymnyń keıpin kııý, onyń ishki náziktigin júrekpen berý — óte úlken eńbek. Týrandot operasy sońy tragedııasyz, basty keıipkerlerdiń birge qosylýymen aıaqtalady. Bul operanyń ereksheligi deýge bolady, óıtkeni Pýchchınıdiń basqa shyǵarmalary tragedııamen aıaqtalǵan, — deıdi Bıbigúl Januzaq.
Operanyń taǵy bir mańyzdy jelisi — Lıý kúń qyzdyń taǵdyry. Solıs Mádına Islamova bul keıipkerdiń jan tebirenterlik tarıhyn búgingi ómirmen baılanystyrady. Lıý — bir kezderi Kalaf hanzadanyń ózine bir ret jymıyp qaraǵany úshin, búkil ómirin qurban etýge daıyn keıipker.
— Jaı ǵana adamnyń adamǵa kúlimsireýi, osy jylýlyq oǵan ómirge degen kúsh bergen. Bul qazirgi qarbalas zamanda bárimizge de jetispeıtin dúnıe emes pe? — deıdi ol.
Aıta keteıik, buǵan deıin «Astana Opera» teatrynda Ermek Serkebaevtyń 100 jyldyǵyna arnalǵan kontsertter legi bastalǵanyn jazǵan edik.