PTR testileý qandaı jaǵdaıda tegin jasalady

NUR-SULTAN. QazAqparat – Nur-Sultan qalasynyń Qoǵamdyq densaýlyq saqtaý basqarmasy basshysy Tımýr Muratov PTR testileý tegin jasalatyn sanattardy aıtyp berdi, dep habarlaıdy QazAqparat tilshisi.

«Eger turǵyndardan jedel respıratorly vırýsty ınfektsııa (JRVI) sımptomdary baıqalsa, olarǵa PTR analız tegin jasalady. Epıdemıologııalyq kórsetkish boıynsha sol naýqastarmen baılanysta bolǵandarǵa da PTR synaǵy tegin jasalady. Sosyn aptasyna bir ret júkti áıelderdi arnaıy tekserip otyramyz. Ol da tegin bolady. Qalǵan jaǵdaıda eger adamdar ózi tekserilgisi kelse, shetelge shyǵatyn bolsa, eńbek demalysynan keıin jumysqa shyqsa, PTR synaqty óz qarajatyna tapsyrýy kerek», - dep túsindirdi T.Muratov Nur-Sultan ákimdiginde ótken brıfıngte.

Onyń aıtýynsha, qala statsıonarlarynda 204 naýqas em alýda. 560 tósek-oryn daıyndalyp, onyń 38 paıyzynda naýqastar jatyr.

COVID-19 úshin bıomaterıal jınaıtyn zerthanalar sany 16-ǵa deıin kóbeıtildi, jalpy qýaty táýligine 11 myńnan astam zertteý júrgizýge jetedi.

Buǵan deıin Tımýr Muratov JRVI belgileri baıqalǵan jaǵdaıda ne isteý kerektigin túsindirgen edi.