PTR test qorytyndysyn qoldan jasap satpaq bolǵan óskemendik 2 jylǵa sottalýy múmkin
NUR-SULTAN. QazAqparat – Koronavırýsqa qarsy PTR test qorytyndysyn qoldan jasap satpaq bolǵan 34 jastaǵy óskemendik turǵyn ınternetke taratqan habarlandyrýdyń izimen qolǵa tústi, dep habarlaıdy QazAqparat tilshisi.
Oqıǵanyń mán-jaıyn Іshki ister mınıstrliginiń baspasóz ókili Shuǵyla Turlybektiń vedomstvonyń aqparat alańynda ótken onlaın brıfıngide aıtyp berdi.
«Óskemende polıtseıler koronavırýs juqtyrmaǵany týraly PTR test anyqtamasyn eshqandaı zerthanalyq taldaýsyz-aq rásimdep beretinin jarnamalap, habarlama taratqan 34 jastaǵy jigitti ustady. Bul qyzmeti úshin ol 15 myń teńge suraǵan. Qazir alaıaqtyq faktisi boıynsha Qylmystyq kodekstiń 190-babymen sotqa deıingi tergeý júrip jatyr. Bul bap boıynsha eki jylǵa deıin bas bostandyǵynan aıyrý jazasy qarastyrylǵan», - deıdi mınıstrliktiń baspasóz ókili.
Shuǵyla Turlybek keltirgen derekterge súıensek, bul – Shyǵys Qazaqstanda tirkelip otyrǵan alǵashqy jaıt emes. Buǵan deıin Semeıde 15 myń teńgege vaktsına pasportyn satqan medıtsına mamandary ustalǵanyn habarlaǵan bolatynbyz.
