PTR test baǵasyna qatysty zań buzýshylyq anyqtalǵan jaǵdaıda qandaı shara qoldanylady

NUR-SULTAN. QazAqparat – PTR test baǵasyna qatysty zań buzýshylyq anyqtalǵan jaǵdaıda kompanııanyń bir jyl boıǵy jalpy kiris mólsheriniń 5%-yn aıyppul retinde ustap qalady. Bul týraly «Kun.kz» saıtynda «JQQ, PTR dıagnostıkasy jáne dári-dármekter naryǵynda baǵa belgileý» taqyrybynda onlaın formatta ótken pikirtalasta aıtyldy, jep habarlaıdy QazAqparat tilshisi.

«PTR dıagnostıkasy naryǵynda testtiń quny ártúrli. 10 myń – 18 myń teńge aralyǵynda. Bul baǵalarǵa qatysty birqatar suraq týyndaıdy. Osy jaǵdaıda biz PTR dıagnostıkasy naryǵyna ne usynǵymyz keletinin, tekserý jumystaryn júrgizgen jaǵdaıda onyń nátıjesi qandaı bolatynyn aıtyp óteıin. PTR test baǵasyna qatysty zań buzýshylyq anyqtalǵan jaǵdaıda kompanııanyń bir jyl boıǵy jalpy kiris mólsheriniń 5%-yn aıyppul retinde ustap qalamyz. Sondaı-aq, kompanııa baǵany kóterý arqyly alǵan monopolııalyq kiristi de ustap qalamyz», - deıdi Básekelestikti qorǵaý jáne damytý agenttiginiń tóraǵasy Serik Jumanǵarın.

Ol PTR dıagnostıkasy naryǵyna qatysýshylarǵa kelisimge kelýdi usynatynyn aıtty.

«PTR dıagnostıkasy naryǵyndaǵy barlyq kompanııany monopolııaǵa qarsy komplaens aktisin jazýdy usynamyz. Bul QR Kásipkerlik kodeksinde bar. Kompanııa monopolııaǵa qarsy komplaens aktisine básekelestikke qatysty ustanymdaryn jazady, al biz ol aktini bekitemiz. Kompanııa kórsetiletin qyzmet túriniń quny ne sebepti osyndaı ekenin dáleldeý úshin kiris, shyǵys mólsherin ashyq kórsetýi kerek. Aldaǵy aptada osyndaı kelisimge kelýdi josparlap otyrmyz. Bizdiń jumysymyzdyń negizgi quraly osy bolmaq. Osy usynystan bas tartqan jaǵdaıda kompanııaǵa tekserý jumysyn júrgizýdi qolǵa alamyz. Negizi bizdiń mindet – jazalaý emes, bizdiń mindet – meılinshe kóp adamdy PTR testten ótkizý. Ótkenderdiń 55%-y óz qarajaty esebinen, al 45%-y MÁMS esebinen tóleýde», - deıdi ol.