PTR test arqyly COVID-19 juqtyrý múmkin emes - ákimdik
ALMATY. QazAqparat - Almaty ákimdigi COVID-19 indetin test tapsyrý kezinde juqtyryp alýǵa bolady degen qaýesetti joqqa shyǵardy, dep habarlaıdy QazAqparat tilshisi.
«Áleýmettik jeliler men messendjerlerde Almatyda test tapsyrý kezinde aýrý juǵypty-mys degen aqparat shyndyqqa janaspaıdy. Koronavırýs ınfektsııasyna test tapsyrý kezinde tek sertıfıkattalǵan reagentter paıdalanylady. Koronavırýsty dıagnostıkalaý máselesi erekshe baqylaýǵa alynǵan. Biz arandatýshylar men alyp-qashpa áńgimelerdiń sońynda ketpeı, resmı aqparat kózderine júginýdi suraımyz»,- dedi Komıssııa tóraǵasy, Almaty qalasy ákiminiń orynbasary Erjan Babaqumarov.
Qazir Almatyda COVID-19-dy anyqtaý testin júrgizetin 7 zerthana (Ulttyq saraptama ortalyǵy, Sanıtarlyq-epıdemıologııalyq saraptaý jáne monıtorıng ǵylymı-praktıkalyq ortalyǵy, M. Aıqymbaev atyndaǵy asa qaýipti ınfektsııalar ulttyq ǵylymı ortalyǵy, Ortalyq referens-zerthana, Medical Partners Korea Clinic qazaqstandyq-koreılik klınıkasy, «Olımp» KDZ, «Atakent» QІQO aýmaǵyndaǵy modýldi keshen) qyzmet etip jatyr.
Saraptama tapsyrýdyń barlyq pýnktterinde osy baǵyttaǵy jumystardy retteıtin sanıtarlyq erejelerdiń talaptary saqtalady, qyzmetkerlerdiń bıologııalyq qaýipsizdikti qatań saqtaýy barlyq júrgiziletin protsedýranyń kepili bolyp tabylady. Óz kezeginde, test júrgizý úshin paıdalanylatyn reagentter tekserýdiń barlyq kezeńderinen ótti. Sonyń nátıjesinde jumysta ony tek QR-da ǵana emes, búkil álem boıynsha qoldanýǵa ruqsat etilgen. Analız sterıldi, bir rettik materıalmen (zondtarmen) jasalady, olar paıdalanylǵannan keıin belgilengen erejeler sáıkes paıdaǵa (kádege) asyrylady. Qaıtadan paıdalanýǵa jol berilmeıdi.
«Qazaqstan Respýblıkasynyń Bas memlekettik sanıtar dárigeriniń Qaýlysyna sáıkes, referens-zerthanalardyń mamandarymen jasalyp jatqan zertteýlerdiń monıtorıngtik baqylaýy júrgizilýde. Komıssııa óz tarapynan COVID-19-ǵa tekserý boıynsha halyqqa qyzmet kórsetetin jekemenshik zerthanalardyń basshylaryn karantındi kúsheıtý kezindegi sharalardy uıymdastyrý men baqylaý týraly: maska taǵý rejıminiń, kezekte áleýmettik qashyqtyqtyń, naýqastardyń aldyn ala jazylýy, zertteý júrgizý úshin qan tapsyrý kólemin bólýdi qosymsha eskertedi»,- dedi Erjan Babaqumarov.
