PTR dıagnostıkasyn jasaıtyn kompanııalar test baǵasyn arzandatýǵa daıyn
NUR-SULTAN. QazAqparat – PTR dıagnostıkasy naryǵynda úsh iri sýbekt jumys isteıdi. Olar: «Olımp» klınkalyq-dıagnostıkalyq zerthanasy, Ulttyq saraptama ortalyǵy, INVIVO zerthanasy jáne 30-dan astam usaq kompanııa bar. Bul týraly «Kun.kz» saıtynda «JQQ, PTR dıagnostıkasy jáne dári-dármekter naryǵynda baǵa belgileý» taqyrybynda onlaın formatta ótken pikirtalasta aıtyldy, dep habarlaıdy QazAqparat tilshisi.
«Ulttyq saraptama ortalyǵynda sáýir aıynan beri PTR testtiń baǵasy (11 500 teńge) ózgergen joq, «Olımp» klınkalyq-dıagnostıkalyq zerthanasy (12 320 teńge) men INVIVO zerthanasynda (15 000 teńge) baǵanyń ózgerý dınamıkasy baıqalady. Sońǵy málimetterge súıenetin bolsam, atalǵan kompanııalar baǵany arzandatýǵa daıyn», - deıdi Básekelestikti qorǵaý jáne damytý agenttiginiń tóraǵasy Serik Jumanǵarın.
Ol basqa memleketterde PTR testtiń baǵasy ortasha eseppen qansha ekenin aıtty.
«Tekserý jumystaryn bastamaǵandyqtan atalǵan kompanııalardyń býhgalterlik qujattaryn teksere almaımyz. Bul sýbektilerdi jazalaý nıetimiz joq bolǵandyqtan tekserý jumystaryn áli bastaǵan joqpyz. Mundaı qıyn kezeńde olarǵa tekserý jumysyn júrgizip, bankrot bolý jaǵdaıyna jetkizgimiz kelmeıdi. Biz olarmen kelisip, baǵany retteý týraly usynys aıtamyz. Mysaly, Belarýs memleketinde PTR test baǵasy teńgege shaqqanda – 6 600 teńge. Reseıde – 12 myń teńge. Armenııa men AQSh-ta – 21 myń teńge. Bolgarııa men Frantsııada – 25 myń teńge. Germanııada – 27 myń teńge. PTR test baǵasy qymbat memleketterde ómir súrý deńgeıi, jalaqy mólsheri de bizdiń memleketke qaraǵanda basqasha», - deıdi ol.
