PTR anyqtamasy joq sheteldikti bortqa kirgizgen áýe kompanııasyna qansha aıyppul salynady
Eske sala ketsek búgin QR Úkimetiniń baspasóz qyzmeti vedomstvoaralyq komıssııanyń áýe kompanııalaryna PTR testi nátıjesi týraly anyqtamasy joq jolaýshylardy ushaqqa otyrǵyzýǵa tyıym salý týraly sheshimin túsindirgen bolatyn. Bul talap tek sheteldik azamattarǵa qatysty. Shetelde júrgen QR azamattarynyń áýe reısterimen PTR testileýden ótkeni týraly anyqtamasynsyz otanyna oralýǵa quqyǵy bar. Mundaı jaǵdaıda Qazaqstanǵa kelgennen keıin qazaqstandyqtar PTR testileý nátıjesin alǵanǵa deıin karantınge ornalastyrylatyn bolady. QR óńirleri arasyndaǵy ishki áýe reısteriniń ushaǵyna otyrǵyzý kezinde PTR test nátıjesi týraly anyqtama talap etilmeıdi.
OKQ-da ótken baspasóz máslıhatynda Kóliktegi bas memlekettik sanıtarlyq dáriger Sádýaqas Baıǵabylov bul aqparatty rastaı otyryp, shetelde júrgen otandastarymyzǵa elge kelerde mindetti túrde PTR testiden ótý kerektigin eskertti.
«Búgingi alys bolsyn, jaqyn bolsyn shetelde júrgen otandastarymyzǵa PTR testiden ótýdiń qıyndyǵy joq. Sebebi halyqaralyq áýejaılarda, qalalar men otelderde test tapsyratyn pýnkt bar. Analız qorytyndysy bir táýliktiń ishinde belgili bolady. Bizdiń monıtorıng kórsetip otyrǵandaı, eki kúndik karantınge jatqyzylatyn otandastarymyzdyń kóbi demalystan keledi. Kóbi Túrkııa men Arab Ámirlikterinen oralady. Al jumys saparymen barǵan otandastarymyz ben stýdentterimiz PTR anyqtamamen oralýda», - dedi Sádýaqas Baıǵabylov.
Ol sonymen qatar 27 qazannan bastap PTR test anyqtamasynsyz keletin sheteldikter elge kirgizilmeıtinin eskertti.
«Al bortqa PTR anyqtamasy joq sheteldikterdi kirgizgen áýe kompanııalary ákimshilik jaýapkershilik qarastyrylǵan. Áýe kompanııalarynyń mundaı quqyqbuzýshylyǵy úshin 1600 AEK kóleminde aıyppul salynady», - dedi ol.