PSJ jeńisinen keıin Frantsııada tártipsizdik bolyp, 400-den astam adam ustaldy
ASTANA. KAZINFORM — Chempıondar lıgasynyń fınalynda Parı Sen-Jermen klýby Londonnyń Arsenal FC komandasyn jeńgennen keıin Frantsııanyń birneshe qalasynda tártipsizdik boldy. Fýtbol jankúıerleri men polıtsııa arasyndaǵy qaqtyǵystar saldarynan 400-den astam adam ustaldy, dep habarlaıdy BBC.
Fınaldyq kezdesý Budapest qalasynda ótti.
Parıjde qoǵamdyq kólik qozǵalysyna kedergi keltirgen tártipsizdikterdi toqtatý úshin myńdaǵan polıtsııa qyzmetkeri jumyldyryldy.
Jankúıerler otshashýlar men jaryq belgilerin iske qosqan.
Qala ortalyǵynda polıtsııa jınalǵan topty taratý úshin kózden jas aǵyzatyn gaz qoldandy.
Tártipsizdik kezinde alty avtokólikke zaqym keldi.
Eki kásiporynnyń múlki búlindi.
Sondaı-aq bir avtobýs aıaldamasy qıraǵan.
Frantsııanyń Іshki ister mınıstrligi jeksenbi tańyna qaraı 416 adamnyń ustalǵanyn habarlady.
Olardyń 280-i Parıjde qolǵa túsken.
Osyǵan uqsas oqıǵalar ótken jyly da tirkelgen bolatyn.
Sol kezde PSJ alǵash ret Chempıondar lıgasyn jeńip, tártipsizdikter kezinde eki adam qaza tapqan edi.
Frantsııanyń ishki ister mınıstri Loran Nýnes bıyl bılik mundaı jaǵdaıǵa jaqsy daıyndalǵanyn aıtty.
Onyń sózinshe, qaýipsizdik júıesi senimdi ári turaqty jumys istegen.
Soǵan qaramastan jeti polıtsııa qyzmetkeri jaraqat alǵan.
Loran Nýnes bolǵan oqıǵany «múlde jol berýge bolmaıtyn áreket» dep atady.
Frantsııanyń ońshyl saıasatkeri Marın Le Pen X áleýmettik jelisinde pikir bildirdi.
— Tek Frantsııada ǵana fýtbol klýbynyń jeńisi tártipsizdikke ulasady. Tek Frantsııada ǵana adamdar jeńis keshinde zorlyq-zombylyqtan qorqyp, úılerinen shyqpaı otyrýǵa májbúr bolady, — dep jazdy ol.
Parıjden taraǵan beınejazbalarda jaǵylǵan alaýlar, órtengen elektr velosıpedteri jáne dúkenderdiń syndyrylǵan terezeleri kórinedi.
Buǵan deıin senbi kúni PSJ jankúıerleri klýbtyń «Park de Prens» stadıonynda alyp ekrannan fınaldy tamashalaý kezinde de polıtsııamen qaqtyǵysqan bolatyn.
Aıta keteıik, mamyr aıynda Parı Sen-Jermen komandasy Mıýnhenniń «Bavarııasyna» qarsy matchta teń oıyn kórsetip, Chempıondar lıgasynyń fınalyna shyqty. Bul jeńis jappaı merekeleýge ulasyp, keıin polıtsııamen qaqtyǵysqa sebep boldy.
