PSJ 2025 jylǵy qurlyqaralyq kýboktyń ıegeri atandy

ASTANA. KAZINFORM – Frantsııalyq PSJ komandasy 2025 jylǵy qurlyqaralyq kýbok úshin ótken oıynda brazılııalyq «Flamengo» komandasyn penaltı serııasynda jeńdi. 

Negizgi ýaqytta qos klýbtyń oıynshylary 1:1 esebimen teń tústi. 

Kezdesýdiń 9-mınýtynda Fabıan Rýıs komandasyn esepte alǵa shyǵarǵan. Alaıda bul gol esepke alynbady. Báribir oıynnyń alǵashqy bóliginde Lýıs Enrıkeniń fýtbolshylary birinshi goldy soǵyp, jankúıerlerin bir jelpindirip aldy. Bul joly 38-mınýtta grýzııalyq jartylaı qorǵaýshy Hvıcha Kvaratshelııa mergendigimen kózge tústi. 

Al, matchtyń ekinshi bóliginde brazılııalyq komandanyń sapynan Jorjıno gol soǵyp, tarazy basyn teńestirdi. Italııa quramasynyń oıynshysy penaltıdi sátti oryndady. Degenmen budan keıin tablodaǵy esepke ózgeris engen joq.  Osylaısha oıyn overtaımǵa deıin jalǵasty. Bul 30 mınýt aralyǵynda da esep ózgerissiz qaldy. 

Penaltı serııasynda parıjdikterdiń mereıi ústem boldy. «Flamengo» fýtbolshylarynyń 4 soqqysyn qaıtarǵan reseılik qaqpashy Matveı Safonov Qurlyqaralyq kýbok fınalynyń úzdik oıynshysy atandy. 

Eske sala keteıik, budan buryn Saýd Arabııasynyń taq murageri «Barselonany» satyp alýy múmkin ekenin habarlaǵan edik.