Pskovta tabylǵan áıel súıegi Álııa Moldaǵulovaniki bolýy múmkin
ASTANA. 17 qyrkúıek. QazAqparat - Reseıdiń Pskov oblysyndaǵy baýyrlastar molasynan tabylǵan áıel súıegi Keńes Odaǵynyń batyry Álııa Moldaǵulovanyń máıiti bolýy yqtımal.
Bul týraly «QazAqparat» tilshisine bergen suhbatynda qazaqstandyq izdeýshiler otrıadynyń jetekshisi, «Boevoe bratstvo» qorynyń quryltaıshysy, Aqtóbe oblystyq Aýǵan soǵysy ardagerleri odaǵy uıymynyń basshysy Gýmer Galıev málim etti.
Onyń aıtýynsha, Á.Moldaǵulovanyń denesin izdep barǵan qazaqstandyq ekspedıtsııa Pskov oblysyndaǵy ormandy alqaptyń ishinen 173 jaýyngerdiń denesin tapqan. Onyń ishinde úsh áıeldiń súıegi alynypty. Onyń ekeýiniń ulty orys, snaıper men medbıkeler vzvodynyń komandıri bolsa, úshinshisi mońǵol tektes násildi.
«Bizben birge Máskeýden patalogoanatom jumys istedi. Ol ekspedıtsııa músheleriniń bul joramalyn rastap otyr», - deıdi G.Galıev.
Іzdeýshiler otrıady Velıkıe Lýkı qalasyndaǵy sot-medıtsınalyq saraptamaǵa júgingen. Sarapshy Roman Zýev tabylǵan súıektiń boıy 150-160 santımetr, shamamen 20-25 jas aralyǵyndaǵy mońǵol tektes násildi áıel adamǵa tıesili ekendigin anyqtaǵan. Sonymen qatar, bul 50-60 paıyzǵa Álııa Moldaǵulovanyń denesi bolýy múmkin degen joramal aıtqan.
«Molada jaýyngerlerdiń jeke zattary tabylyp otyr. Súıektiń janynda aına jatty. Bul óz kezeginde súıek áıel adamdiki ekendigin taǵy bir dáleldeıdi. Sonymen qatar Álııa Moldaǵulova qaza tappastan úsh kún buryn kóz jumǵan 54-shi atqyshtar brıgadasynyń sarbazy Fedor Stepanychtiń medalony anyqtaldy. Búginde bassúıektiń úlgileri batyrdyń týǵan-týystaryna berildi. Endi oǵan genetıkalyq saraptama jasaý qajet», - dedi G.Galıev.
Іzdeýshiler otrıady Pskov oblysynyń ormandy alqabyndaǵy batpaqty jerlerde jumys jasady. Qazirgi ýaqytta atalmysh molada áli de bolsa 543 jaýyngerdiń súıegi jatyr. 2-shi Baltyq maıdany 22-shi armııa 54-shi arnaıy atqyshtar brıgadasy jaýyngerleriniń deneleri Pskov oblysy Novosokolnık aýdany Monakovo aýylyndaǵy memorıaldyq eskertkishte 2013 jyldyń 20 tamyzynda qaıta jerledi.
