Psıhotroptyq zattardy ótkizgen kámeletke tolmaǵan jetkinshek 7 jylǵa sottaldy

ASTANA. KAZINFORM — Túrkistan oblysynyń qylmystyq ister jónindegi mamandandyrylǵan aýdanaralyq soty Túlkibas aýdanynyń 17 jastaǵy turǵynyn asa iri kólemde psıhotroptyq zattardy taratqany úshin 7 jylǵa bas bostandyǵynan aıyrdy.

Tergeý barysynda Mynbaı aýylynda turatyn jasóspirim Telegram-arnalary arqyly esirtki bıznesin uıymdastyrýshylarmen baılanys ornatyp, birneshe aı boıy Shymkent jáne Saryaǵash qalalarynda esirtki kýreri retinde jumys istegeni anyqtaldy.

— Qylmystyq shemaǵa psıhotroptyq zat — metkatıondy (mefedronnyń analogy) alý jáne býyp-túıý, oraý materıaldaryn satyp alý, ártúrli mekenjaılarǵa «qalta» jasaý jáne arnaıy shıfrlanǵan baılanys arnalary arqyly esep berý kiredi. Tólem krıptovalıýta arqyly júrgizilip, P2P-servıster arqyly teńgege aýdarylǵan. Kúdiktiden 29 oram esirtki jáne taǵy 26 oramda 41 «qalta» tabylyp, tárkilendi. Jalpy salmaǵy 136 gramnan asady, — delingen habarlamada.

Aıta ketelik Qyzylordada esirtki qylmysyna qatysty 22 adam ustaldy.