Psıhoterapevt oıynǵa táýeldi adamnyń mıynda qandaı ózgerister bolatynyn aıtty
ASTANA. KAZINFORM - Asfendııarov atyndaǵy qazaq memlekettik medıtsına ýnıversıtetiniń professory, psıhoterapevt Fatıma Bagııarova vırtýaldyq oıynǵa táýeldi balanyń mıynda, fızıologııasynda qandaı ózgerister bolatynyn aıtyp berdi.
– Dáriger retinde men oıynǵa táýeldilik týraly aıtqanda sózdi patofızıologııadan bastaýdy jón kóremin. ıAǵnı vırtýaldy oıynǵa táýeldi adamnyń mıynda qandaı qubylystar bolyp jatatyny jaıly aıtamyz. Birinshi kezekte, mıdaǵy «sur zat» kólemi azaıady. Sodan mıdyń qyzmeti buzylyp, sheshim qabyldaý, óz is-áreketin basqarý qıynǵa soǵa túsedi. Oıyn ómirdi sezinýdiń negizgi kózine aınalady. Basqanyń bári aınanyń arǵy jaǵyndaǵy kóriniske uqsap ketedi, - dedi ol «Balalar men jasóspirimder arasyndaǵy oıynǵa táýeldilik» taqyrybyndaǵy konferentsııa barysynda.
Mamannyń aıtýynsha, vırtýaldy oıyndardy oınaý kezinde neıromedıatorlar, ıaǵnı naqty bir is-áreketter kezinde bólinetin gormondar qyzmeti de úlken ózgeriske ushyraıdy.
– Birinshisi – dofamın. Ol bir isti isteýge yntalandyratyn, isti aıaqtaǵandaǵy jetistikten lázzat alý kezinde bólinetin gormon. Kompıýterlik oıyn oınaǵanda ol kóp bóline bastaıdy. Osydan soń adamǵa «dofamındi alý» úshin eshteme isteýdiń qajeti bolmaı qalady, oıyn oınaý arqyly ǵana ol bóline beredi. ıAǵnı bul áreketsizdikke bastaıdy. Ekinshisi – serotonın. Ol kóńil kúıdiń gormony. Onyń bólinýi azaıyp, adam ashýlanshaq, yzaqor bola bastaıdy. Úshinshisi – adrenalın. Ol — ómirden lázzat alý gormony, shynaıy ómirde júrgenimizde bólinedi. Onyń da mólsheri azaıa bastaıdy, - deıdi maman.
Aıta keteıik, ata-anasy az kóńil bóletin bala vırtýaldy oıynǵa ońaı táýeldi bolady.
Sondaı-aq adamdardyń oıynǵa táýeldi bolyp qalýynyń basty sebepteri aıtyldy.