Psıhonevrologııalyq ınternat tárbıelenýshileriniń fýtbol týrnıri - fotoreportaj

Óńirlik jarys osymen ekinshi jyl Astanadaǵy «Nurly júrek» áleýmettik qyzmet kórsetý ortalyǵynda ótip jatyr. Bul jarysqa elordadan, Aqmola, Pavlodar, Qaraǵandy oblystarynan 10 komanda keldi, jalpy sany 56 sportshy baq synaıdy. Al, kelesi aptada Almatydaǵy respýblıkalyq týrnırde jeńiske jetken komanda Polshanyń Torýn qalasyndaǵy álemdik týrnırge joldama alady.

Týrnır tarıhy

1992 jyly Polshanyń Torýn qalasynda alǵash ret múgedekterdiń jergilikti fýtbol oıyndary ótken bolatyn. Oǵan Torýn tańǵysh materıaldar zaýyty (TZMO) demeýshilik etken. 2000 jyldary TZMO qyzmeti Eýropaǵa keńinen taralyp, áleýmettik joba aýqymy da keńeıe túsken. Qazirgi tańda SENI Cup týrnırleri Polsha, Reseı, Ýkraına, Belorýssııa, Germanııa, Majarstan, Chehııa, Slovakııa jáne Baltyq elderinde ótedi.

SENI Cup týrnıri psıhonevrologııalyq ınternat tárbıelenýshileri arasynda ótedi. Ondaǵy mindetterdiń biri – ózara qurmet prıntsıpterine súıene otyryp, qoǵam men aqyl-oı damýynda aýytqýy adamdardy biriktirý. Týrnırge qatysý jáne fýtbol alańyndaǵy jeńister tek dene shynyqtyrýǵa ǵana áser etip qoımaı, qatysýshylardyń óz kúshine degen senimin nyǵaıtady, óz-ózin baǵalaýdy arttyrady.

Sonymen birge, SENI Cup kúndelikti kúıbeń tirlikten arylyp, psıhonevrologııalyq aýrýǵa ushyraǵan jandardyń ózara dostar tabýyna, áleýmettik ortaǵa beıimdelýine múmkindik beredi.

SENI Cup karantınde de týrnır di toqtatpady

Alǵash ret Qazaqstandaǵy SENI Cup mını-fýtbol týrnıri 2017 jyly Almaty qalasynda ótken edi. Sodan beri jeti jyl boıy bul týrnır psıhonevrologııalyq ınternat tárbıelenýshileri arasynda dástúrli túrde uıymdastyrylyp keledi. Úsh jyl burynǵy koronavırýs pandemııasynda da SENI CUP týrnıri úzilgen joq. Osylaısha, 2020 jylǵy týrnır Facebook jáne Instagram jelilerinde onlaın rejımde ótken. Oǵan Qazaqstannyń túrli qalalarynan 9 komanda qatysqan.

Onlaın týrnırde komandalar apta saıyn sálemdesý, jongler jasaý, drıblıng, úzdik bombardır, uran boıynsha tapsyrma alyp otyrǵan. Bir aptada vıdeolaryn óz paraqshalaryna júktep, seniclubkz paraqshasyn belgilep salyp otyrdy. Osylaısha, jeńimpazdar beınejazbaǵa qaraı anyqtaldy.

Búginde polshalyq TZMO gıgıenalyq, kosmetıkalyq jáne medıtsınalyq ónim óndirip, álemdik naryqqa shyǵaratyn kompanııaǵa aınaldy. 20 jyldan astam ýaqyt boıy bul ónimderdi Qazaqstan naryǵyna OASIS GROUP DISTRIBUTION kompanııasy usynyp keledi. Qazaqstandaǵy týrnırdiń basty uıymdastyrýshysy da – osy uıym.

«Búgin biz zııatkerlik múmkindikteri shekteýli adamdar úshin SENI CUP aımaqtyq týrnırin ótkizemiz. Onyń jeńimpazdary kelesi aptada Almatydaǵy respýblıkalyq jarysqa barady. Ondaǵy bas júlde – Polshaǵa halyqaralyq chempıonatqa sapar bolady. Jalpy, bul bastama áleýmettenýge jáne qoǵamǵa beıimdelýge baǵyttalǵan. Bıyl bizdi «Nurly júrek» daǵdarys ortalyǵy taǵy da qoldady, bizge fýtbol alańy men óz komandasyn usynyp otyr», - dedi kompanııanyń basqarýshy dırektory Anatolıı Jýravlev týrnırdiń ashylý saltanatynda.

Internat tárbıelenýshilerine sporttyń paıdasy kóp

Bıyl 28-31 tamyz kúnderi Polshanyń Torýn qalasyndaǵy SENI CUP álemdik týrnırinde qaraǵandylyq Arnaıy qyzmet kórsetý ortalyǵynyń «Arlan» komandasy el namysyn qorǵap, júldeli ekinshi oryndy ıelendi. Ortalyq dırektory Aslan Mekentaıuly komandanyń óte tájirıbeli ekenin aıtady.

«Bizdiń ortalyqta 18 ben 70-80 jas aralyǵyndaǵy 254 adam turady. 2017 jyldan bastap SENI CUP týrnırine qatysyp kelemiz. Tipti, 2019 jyly Polshadaǵy álemdik jarysqa joldama alǵan edik, biraq karantın saldarynan bara almaı qaldyq. Byltyr Astana jáne Almaty qalalarynda jeńiske jetip, Polshanyń Torýn qalasyna bardyq. Ol jaqta 7 memleketten kelgen 36 komanda arasynda jarys ótti. Júldeli ekinshi oryn ıelenip, Qazaqstannyń kók týyn kóterdik. Polshalyqtardyń aıtýynsha, biz Qazaqstannan kelip, júldeli oryn alǵan jalǵyz komandamyz», - dedi Aslan Mekentaıuly.

Fýtboldan bólek, ortalyq turǵyndary sportty jaqsy kóredi, jyl boıy basseınge baryp, shańǵy, voleıbol, ústel tennısimen aınalysady.

«Sebebi, jumys bolmasa, belsendi jattyǵý bolmasa ómir sapasy nasharlaıdy, keshke uıqysyzdyq bolady. Sportqa jaqyn adamdar ómirge zııandy nárse istemeıdi, ózin ustaýdy úırenedi, ushaqqa minip, el men jer kóredi. Eýropa kóshelerinde «Alǵa, Qazaqstan» dep kók týymyzben júrdik, olardyń patrıottyq sezimin sózben aıtyp jetkize almaımyn. Tipti, sporttyń arqasynda buryn qabyldap júrgen dárilerdi azaıtyp jatyr. Endi úlken jabyq ǵımarat salyp, fýtbol jattyǵýyn qysy-jazy úzbeı ótkizgimiz keledi», - deıdi spıker.

Sonymen birge, A. Mekentaıuly mundaı týrnır ótkizýde medıtsınadyq mamandardyń eńbegi orasan zor ekenin jetkizdi.

«Óıtkeni, oıyn barysynda túrli jaǵdaılar bolady. Mysaly, álemdik chempıonatta Germanııadan kelgen oıynshy bapkerdi uryp jiberdi. Bizdiń ortalyqtyń medbıkesi 11 saǵat ushaqta, 12 saǵat poıyzda oıynshylardyń qan qysymyn tekserip, jarys aldynda dári-dármegin ýaqtyly berip qadaǵalap otyrdy. Bul salada jumys isteý úshin úlken júrek kerek. Ortalyqta ózimnen jasy úlken naýqastar turady, kúnde jumysqa kelgende olar «Áke» dep aldymyzdan júgirip shyǵady. Kózińe eriksiz jas keledi. Sondyqtan, úlken meıirimmen emdelýshilerdiń jaǵdaıyn barynsha jasaýǵa tyrysamyz», - deıdi A. Mekentaıuly.