Psıhologtardyń memlekettik tizilimi: mamandardyń jaýapkershiligi artady
ASTANA. KAZINFORM – Búgin Senattyń jalpy otyrysynda «Psıhologııalyq qyzmet týraly» Zań maquldandy.
- Búginde psıhologııalyq qoldaýdyń mańyzy qoǵam ómiriniń barlyq salasynda artyp keledi. Azamattardyń emotsıonaldyq saýlyǵyn saqtaý, otbasy ınstıtýtyn nyǵaıtý, balalar men jastardyń úılesimdi damýyn qamtamasyz etý, eńbek ujymdarynda qolaıly psıhologııalyq ahýal qalyptastyrý kásibı psıhologııalyq kómektiń sapaly bolýyn talap etedi. Zań psıhologııalyq qyzmet kórsetý salasynda biryńǵaı quqyqtyq negiz qalyptastyrýǵa, azamattardyń sapaly psıhologııalyq kómek alýyna baǵyttalǵan. Qujatta psıhologtardyń kásibı daıarlyǵyna qoıylatyn talaptardy kúsheıtý kózdelgen. Atap aıtqanda, kásiptik standart engizilip, mamandardyń daıarlyq deńgeıine, kásibı quzyretterine jáne biliktiligine naqty talaptar belgilenedi, - dedi senator Ásem Rahmetova.
Sonymen qatar psıhologtardyń Ádep kodeksi bekitilip, kásibı jaýapkershilik pen qupııalylyq qaǵıdattaryn saqtaý qamtamasyz etiledi. Psıhologııalyq kómektiń sapasyn arttyrý maqsatynda ǵylymı negizdelgen ádisterdi qoldaný talaby engizilip, mamandardyń kásibı damýyn qoldaıtyn sýpervızııa ınstıtýty qarastyrylǵan.
- Zańnyń mańyzdy jańalyqtarynyń biri – psıhologtardy sertıfıkattaý ınstıtýtyn engizý. Sertıfıkattaý mamannyń kásibı daıarlyǵy men biliktilik talaptaryna sáıkestigin baǵalaýǵa múmkindik beredi. Sondaı-aq psıhologtardyń memlekettik tizilimin júrgizý kózdelip otyr. Memlekettik tizilimge engen psıhologtar óz isine jaýapkershilikpen qaraýǵa mindetti bolady. Atalǵan tetikterdi engizý úshin elimizde qajetti kadrlyq jáne ınstıtýtsıonaldyq negiz qalyptasqan. Ǵylym jáne joǵary bilim mınıstrliginiń málimetine sáıkes, psıhologtardy 43 joǵary oqý orny daıarlaıdy. Bakalavrıat, magıstratýra jáne doktorantýra baǵdarlamalary boıynsha shamamen 17 myń stýdent bilim alyp jatyr, al jyl saıyn 4 myńǵa jýyq maman oqýyn aıaqtaıdy. Sonymen qatar Memleket basshysynyń tapsyrmasyna sáıkes, elimizdiń barlyq óńirinde psıhologııalyq qoldaý ortalyqtary jumys isteıdi. Byltyr atalǵan ortalyqtar 50 myńǵa jýyq psıhologııalyq keńes bergen, - dedi depýtat.
Jalpy, zań psıhologııalyq qyzmet kórsetý júıesin odan ári jetildirýge, kórsetiletin kómektiń sapasy arttyrýǵa, azamattardyń psıhologııalyq saýlyǵyn nyǵaıtýǵa baǵyttalǵan mańyzdy quqyqtyq negiz bolmaq.
Eske salsaq, bıyl maýsym aıynyń basynda Parlament Májilisi «Psıhologııalyq qyzmet týraly» Zańdy ekinshi oqylymda qarap, qabyldady.
