PSIHOLOGTAR: Selfıge qumarlyq - psıhologııalyq aýytqýshylyq
ASTANA. QazAqparat - Amerıkanyń psıhıatrlar qaýymdastyǵy selfıge qumarlyq - psıhologııalyq aýytqýshylyq ekendigin resmı túrde rastady. Bul týraly sheteldik BAQ jazady.
Qaýymdastyq Chıkago qalasynda jańa selfies dertiniń damý satylaryn jiktep kórsetti.
Psıhıatrlardyń pikirinshe, selfies derti ózin sýretke túsirýge ásire áýestik pen sol sýretti áleýmettik jelige qoıýǵa qumarlyqtyń shektenasqan kórinisi retinde sıpattalady. Adamdar bundaı qadamǵa ózine degen qurmettiń jetispeýshiliginen, ózin jetkilikti deńgeıde baǵalaı almaǵandyqtan baratyn kórinedi.
Aıta keteıik, selfı - ózin ózi fotoǵa túsirý nemese fotoavtoportret uǵymyn beredi. Bul sóz qoǵamda 2000 jyldary ene bastap, uıaly telefondardaǵy sýretke túsirý tetikteri damyǵan 2010 jyldary keńinen taraldy. Qazirgi tańda buǵan qumar jastardyń sany álemniń túkpir-túkpirinde jańbyrdan keıingi sańyraýqulaqtaı qaýlap keledi.
Ǵalymdar aýytqýshylyqtyń úsh deńgeıin atap kórsetedi:
Birinshi - adam ózin táýligine keminde úsh ret sýretke túsiredi, biraq ony áleýmettik jelige salmaıdy.
Ekinshisi - asqyna bastaǵan shaǵy, adam ózin táýligine keminde úsh ret sýretke túsiredi jáne olardy áleýmettik jelilerdegi jeke paraqshalaryna mindetti túrde qoıady.
Úshinshisi - asqynǵan túri, adam ylǵı da ózin fotoǵa túsirip, sýretterin áleýmettik jelige qoıǵysy kelip turady. Ondaı adamdar kúnine 6 ret «selfı» aýystyrady eken.
Bir ókinishtisi, qazirgi tańda bul dertten emdelýdiń joldary qarastyrylmapty. Bul qumarlyqtan qutylý úshin jaı ǵana uıaly telefon ustaýdan bas tartý kerek eken. Biraq, bizdiń aqparattyq qoǵamda bir kún qoǵammen «baılanyssyz» júrý múmkin be? Árıne, bul jaǵdaıdy odan ári qıyndata túsedi.
