Psıhologtar reestri jalǵan mamandarǵa tosqaýyl bola ma
ASTANA. KAZINFORM – Senat «Psıhologııalyq qyzmet týraly» zańdy maquldap, salany retteýge baǵyttalǵan jańa talaptardy bekitti. Jańa qujat psıhologtardyń jumysyna qalaı áser etedi? Bul suraqqa otbasy psıhology Erjan Myrzabaev Jibek Joly telearnasynyń «Búgin Live» baǵdarlamasynda jaýap berdi.
Onyń pikirinshe, zańdaǵy ózgeristerdiń basym bóligi psıhologııalyq qyzmettiń sapasyn arttyrýǵa baǵyttalǵan. Ásirese klıenttiń quqyǵy men psıhologtyń jaýapkershiligin naqtylaıtyn normalardyń mańyzy zor.
– Zańda psıhologııalyq qupııa qorǵalatyny aıtyldy. Bul – eń tıimdi tus. Buryn bul tek psıhologııalyq etıkaǵa jatatyn. Budan bólek, eki tarap kelisimshart jasasýy tıis. Psıholog aldymen tutynýshyǵa qandaı metodıkamen jumys isteıtinin tolyq túsindiredi, – dedi ol.
Sonymen qatar Erjan Myrzabaev zań jobasynda áli de jetildirýdi qajet etetin tustar bar ekenin aıtty. Onyń sózinshe, memlekettik tizilimniń engizilýi jalǵan mamandar máselesin tolyq sheshe qoımaıdy.
– Reestrge tek dıplomy bar psıhologtar kiredi dep jatyr. Biraq munyń osal jaǵy bar. Jalǵan psıhologtar reestrge qosyla almaıtyny túsinikti. Alaıda bul olarǵa kedergi bolmaýy múmkin. Olar áleýmettik jelidegi paraqshalarynda qyzmet sıpattamasyn ózgertip, «rýhanı tálimger» dep ózin tanystyryp, jumysyn jalǵastyra beredi. Zańda mamandyq retinde qarastyrylmaǵan baǵyttardy tolyq retteý qajet edi. Onyń ishinde baqsy-balgerler, tarologtar men nýmerologtar da qamtylýy tıis, – dedi spıker.
Psıholog mundaı tájirıbeniń shetelde qalaı qoldanylatynyna da toqtaldy.
– AQSh-ta psıhologtar qyzmetin jelide jarnamalaıdy. Onda qaýymdastyqtardyń psıhologtar tizilimi bar. Adamdar sol jerden ózine qolaıly mamandy tańdap, soǵan júginedi. Biraq bul júıe bizdiń eldegideı memlekettik deńgeıde rettelmegen, – dedi Erjan Myrzabaev.
Suhbat sońynda spıker qoǵamnyń psıhologııalyq saýatyn arttyrý mańyzdy ekenin atap ótti.
– Qazir «psıhologtyń aıtqanyn istep, ókinip qaldym» dep júrgen adam kóp. Biraq psıholog saý adammen jumys isteıdi. Al psıhıkalyq aýytqýy bar adamdardy psıhıatr emdeıdi. Sondyqtan psıhologqa barǵan adamnyń jaýapkershiligi ózinde qalady. Psıhologtyń aıtqanyn oryndaý ne oryndamaý – ár adamnyń óz tańdaýy, – dedi spıker.
Buǵan deıin mamandar psıholog pen psıhıatrdyń negizgi aıyrmashylyǵyn taldaǵan bolatyn.
