Psıhologter áskerge daıyn emes 700-den asa adamdy anyqtady — mınıstrlik

ASTANA. KAZINFORM — Qorǵanys mınıstriniń orynbasary Qanysh Ábýbákirov áskerdegi jaǵdaıdy jaqsartýǵa qatysty túsinik berdi.

— Bul turǵyda áskerı bólimderge beınekameralardy ornatýǵa erekshe mán berilgen, baqylaý barlyq jerde bar. Sonymen qatar, psıhologtardyń jumysy kúsheıtildi. Bıyl áskerge shaqyrý kezinde jergilikti psıhologtarmen birge 700-den astam jas jigitti anyqtadyq, ıaǵnı olar áskerge daıyn emes. Olarmen psıhologtar jumys istedi. Jastar ózderine jaıly ortadan shyqqysy kelmeıdi, — dedi Q. Ábýbákirov Parlament Májilisinde tilshiler suraǵyna jaýap bere otyryp.

Sonymen qatar, Qorǵanys mınıstriniń orynbasary qazir álemdegi geosaıası jaǵdaıdy túsinip, ásker qataryna ózderi baryp jatqan jastardyń qarasy qalyń ekenin aıtty. 

Eske salsaq, Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev áskerge SMS-habarlama arqyly shaqyrý qalaı uıymdastyrlatynyn túsindirdi. 

Bolashaq sarbazǵa SMS-habarlama kelgennen keıin 3 kúnniń ishinde shaqyrý beketine barý kerek.
28 tamyzda Qazaqstanda resmı túrde kúzgi áskerge shaqyrý naýqany bastaldy. Ol 31 jeltoqsanǵa deıin jalǵasady. 

Áskerden jaltarǵandar 1 jylǵa sottalýy múmkin.