Psıhologııalyq qyzmet týraly zań salanyń qyzmetin retteı me
ASTANA. KAZINFORM – BIZDIÑ ORTA podkastynda L.N. Gýmılev atyndaǵy Eýrazııa ulttyq ýnıversıtetiniń psıhologııa kafedrasynyń meńgerýshisi Álııa Mámbetalına jańa zań psıhologııalyq qyzmet kórsetý naryǵyn júıeleýge múmkindik beretinin aıtty, dep habarlaıdy Kazinform agenttiginiń tilshisi.
Onyń aıtýynsha, jyl saıyn memleket psıhologtardy daıarlaýǵa qomaqty qarjy bóledi.
– Elimizdegi 40-tan astam joǵary oqý orny psıholog mamandaryn daıarlaıdy. Alaıda olardyń qanshasy mamandyq boıynsha eńbek etip júrgeni, al qanshasy tıisti daıarlyqsyz psıhologııalyq qyzmet kórsetetini týraly naqty derek joq, – deıdi spıker.
Sarapshynyń pikirinshe, jańa zań osy olqylyqtyń ornyn toltyrýǵa sep. Ol kásibı psıhologtar qaýymdastyǵyn qalyptastyryp, bilim berý men praktıkany ózara baılanystyrady. Eń bastysy, azamattardyń bilikti psıhologııalyq kómek alýyna jol ashady.
Álııa Mámbetalınanyń aıtýynsha, sońǵy jyldary qoǵamnyń psıhologtarǵa degen kózqarasy aıtarlyqtaı ózgerdi. Buryn mamanǵa júginý kópshilik úshin tosyn qubylys sanalatyn. Qazir adamdar mazasyzdyq, depressııa, emotsııalyq kúızelis, otbasylyq janjal men psıhologııalyq qoldaýdyń qajettiligi týraly ashyq aıtady. Muny jastardyń psıholog mamandyǵyna degen qyzyǵýshylyǵynyń artýynan baıqaýǵa bolady.
Degenmen suranystyń artýymen qatar jańa máseleler de paıda boldy. Aqparattyq keńistikte ózin psıholog, koých, tulǵany damytý boıynsha maman, energııa terapevti nemese motıvatsııalyq tálimger retinde tanystyratyndar kóbeıdi. Olardyń kópshiliginiń arnaıy psıhologııalyq bilimi joq. Soǵan qaramastan, psıhologııalyq ádisterdi qoldanyp, adamdarǵa keńes beredi. Sarapshynyń aıtýynsha, zań jobasyn ázirleýge dál osy jaǵdaılar sebep bolǵan.
– Psıhologııalyq kómek mindetti túrde kásibı deńgeıde kórsetilýi kerek. Eger qajetti quzyreti joq adam qıyn jaǵdaıǵa tap bolǵan azamattarmen jumys istese, onyń saldary san soqtyrýy múmkin, – deıdi Álııa Mámbetalına.
Mamannyń sózinshe, adamnyń ómirin qysqa merzimde túbegeıli ózgertýdi ýáde etetin motıvatsııalyq trenıngter de qaýip týdyrady. Mundaı sharalar kezinde adam emotsııalyq serpilis sezinedi. Biraq áser uzaqqa sozylmaıdy. Kúndelikti ómirge oralǵan soń ol burynǵy máselelerimen qaıta betpe-bet keledi. Al kásibı qoldaý kóbine bolmaıdy.
Sarapshynyń pikirinshe, qarapaıym azamat úshin dıplomy bar bilikti psıholog pen ózin áleýmettik jelide belsendi jarnamalaıtyn adamnyń aıyrmashylyǵyn ajyratý ońaı emes. Sondyqtan psıhologııalyq qyzmet kórsetý naryǵyn memlekettik deńgeıde retteý ýaqyt talaby.
Osy maqsatta jańa zańda psıhologtardyń resmı tizilimin qurý kózdelgen. Zań kúshine engennen keıin mamandar bilimi men kásibı biliktiligin rastaýy tıis. Tek sodan keıin olar psıhologııalyq praktıkamen resmı túrde aınalysa alady.
Álııa Mámbetalınanyń pikirinshe, mundaı tizilim azamattardy sapasyz qyzmetten qorǵaýǵa kómektesedi. Sonymen qatar psıholog mamandyǵyna degen senimdi kúsheıtedi.
Osyǵan deıin elimizde psıhologııalyq qyzmet týraly zań qabyldanǵany týraly jazdyq.
