Psıholog: Oıynqumarlyq — ár otbasynyń shańyraǵyn shaıqaltyp turǵan másele

ASTANA. KAZINFORM — Qazirgi tańda Qazaqstanda oıynqumarlyq (lýdomanııa) úlken dertke aınalyp, kóptegen otbasynyń shańyraǵyn shaıqaltyp jatyr. Bul týraly psıholog Darıǵa Nazarova aıtty.

Darıǵa Nazarovanyń aıtýynsha, sońǵy jyldary oıynqumarlyqqa shaldyqqandar sany kúrt ósken. 2023 jyly psıhologqa 26 adam kómek surap júginse, 2024 jyly bul kórsetkish 71-ge jetken, onyń 13-i — áıelder.

Onyń sózinshe, oıynqumar adam alǵashqy kezeńde ıllıýzııamen júredi.

— Problema sodan keıin bastalady. Ýaqyt óte týystary men dostary onyń oıynǵa táýeldiligin bilip, oǵan senbeıdi. Saldarynan oıynqumar qaryzǵa batyp, abyroıyn joǵaltyp, qaýqarsyzdyqqa ushyraıdy. Eń qaýiptisi — adam óz máselesin sheshe almaıdy, onyń jalǵyz joly «ólim» dep oılaıdy. Der kezinde janashyr adam tabylyp, mamannyń kómegine júginbese, mundaı jaǵdaı qaıǵyly aıaqtalady, — deıdi Darıǵa Nazarova.

Psıholog atap ótkendeı, oıynqumar adamnyń qaryzyn aınalasyndaǵylar tólemeý kerek, máselesin bireý sheship otyrsa, ol qınalmaıdy, taǵy da tólep beredi dep ózin aldaıdy. 

— Qıyndyqty túsinbese, ol adam máselesin sheshýge qulshynbaıdy. Oıynqumarlyqqa ózine ne kerek ekenin túsinbeı júrgen adam kirip ketedi, — dep túsindirdi maman.

Darıǵa Nazarova oıynqumarlyqty qalaı jeńýge bolatynyn aıtyp berdi:

• Aptasyna bir ret bolsa da óz áreketterińizge baǵa berińiz;
• Qarjylyq saýattylyqty arttyryp, trenıngter men semınarlarǵa qatysyńyz;
• Jaqyndarmen kóbirek ýaqyt ótkizip, týystar men dostarmen qarym-qatynasty nyǵaıtyńyz;
• Sport, mýzyka nemese basqa qyzyǵýshylyqpen aınalysyńyz;
• Oıynqumarlyqty moıyndap, psıholog nemese psıhoterapevt kómegine júginińiz.

— Birikken Ulttar Uıymynyń deregine sáıkes oıynqumarlyq — úlken dert ekenin naqtylady. Alaıda, oıynqumarlar ádette óz aýrýyn moıyndaǵysy kelmeı, «ózim toqtata alamyn» dep aldaıdy. Bul rette týystardyń mindeti — onyń aýrý ekenin túsinip, mamanǵa jetkizý. Maman retinde aıtarym oıynqumarlyqty sanaǵa jetkizý arqyly jeńýge bolady. Ózimiz de, aınalamyzdaǵy janashyrlarymyz da aman bolsyn, — dep tilegin bildirdi Nazarova.

Osyǵan deıin Qazaqstanda lýdomanııa jaıly fılm jaryqqa shyǵatyny belgili boldy.