Psıholog qaı ýaqytta tegin qyzmet kórsetedi
PETROPAVL. KAZINFORM — Psıhologtyń kómegi emhana deńgeıinde kópshilikke qoljetimdi.
«Áleýmettik medıtsınalyq saqtandyrý qory» KEAQ Soltústik Qazaqstan oblystyq fılıalynyń málimetinshe, psıhologtyń nemese psıhoterapevttiń konsýltatsııasy mamandandyrylǵan medıtsınalyq kómektiń medıtsınalyq qyzmetter tizbesine kirgen.
Mamandandyrylǵan medıtsınalyq kómekti beıindi mamandar dıagnostıkanyń, emdeýdiń, medıtsınalyq ońaltýdyń arnaıy ádisterin talap etetin aýrýlar kezinde, onyń ishinde qashyqtyqtan medıtsınalyq qyzmet kórsetý quraldaryn paıdalana otyryp kórsetedi.
Patsıent psıhologtyń kómegin emhanada tegin ala alady, oǵan:
— psıhologtyń qabyldaýy;
— balalar sýıtsıdiniń aldyn alý boıynsha dárister ótkizý;
— minez-qulyq jáne psıhoaktıvti buzylýlarǵa kúdik týyndaǵan kezde qabyldaý;
— áleýmettik, onyń ishinde jasqa beıimdelý máseleleri boıynsha keńes berý;
— sozylmaly aýrýlary bar naýqasty ózindik menedjmentke úıretý;
— júkti áıelderge keńes jatady.
Al jasóspirimder men jastar emhanalardaǵy jastar densaýlyq ortalyqtaryna júgine alady.
Psıhologtyń keńesin tegin medıtsınalyq kómektiń kepildendirilgen kólemi aıasynda, ıaǵnı «saqtandyrylmaǵan» azamattar da ala alady.
Buǵan deıin qandaı jaǵdaıda medıtsınalyq qyzmetkerdi úıge shaqyrýǵa bolatyndyǵyn jazdyq.