Psıholog: Balanyń onlaın oıynǵa táýeldiligi lýdomanııaǵa ákelýi múmkin

ASTANA. KAZINFORM – Álemde 3,5 mıllıard adam onlaın oıyn oınaıdy. Alaıda tsıfrlyq oıyndardyń kóbeıýi balalardyń onlaın qaýipsizdigine jańa syn-qater týǵyzyp otyr. Bul týraly psıholog Samal Atageldi Jibek Joly telearnasynyń «Búgin LIVE» baǵdarlamasynda aıtty. 

Onyń pikirinshe, oıyn balanyń oı-órisin damytýy múmkin, biraq ol tek ata-ananyń baqylaýynda bolǵan jaǵdaıda ǵana paıdaly.

– Aǵylshyn ǵalymdary 2 000 balaǵa zertteý júrgizgen. Oǵan 3-8 jas aralyǵyndaǵy balalar qatysqan. Telefon qaramaǵan balalarmen salystyrǵanda damytýshy oıyn oınaǵan 2 000 balada belsendilik artqany baıqalǵan. Biraq Qazaqstanda jaǵdaı ózgeshe. Sebebi ata-analar balasynyń telefonda ne qarap, qandaı oıyn oınap otyrǵanyna mán bermeıdi, - deıdi psıholog. 

Maman bul úrdistiń balalarda «klıkovoe myshlenıe», tereń oılanýǵa múmkindik bermeıtin oılaý túrin qalyptastyryp jatqanyn aıtady.

– Qazir balalar bir nársege uzaq nazar sala almaıdy. Bul psıhologııasyna áser etip, agressııany kúsheıtedi. Telefondy múlde tyıyp tastaý da durys emes. Bastysy, balany baqylaý jáne onymen sóılesý, - deıdi Samal Atageldi. 

Psıhologtiń sózinshe, keı jaǵdaılarda oıynǵa táýeldilik depressııa men áleýmettik oqshaýlanýǵa ákelýi múmkin. 

– Bala 2-3 jyl boıy bólmesinen shyqpaı, vırtýaldy álemge baılanyp qalýy yqtımal. Bul táýeldiliktiń túbinde psıhologııalyq sebep jatady. Bir bala jeńisti qalaıdy, ekinshisi ózine nazar aýdarǵanyn jáne qoldaý bildirgenin kútedi, - deıdi maman. 

Samal Atageldi onlaın oıyndarǵa shamadan tys qyzyǵýshylyq keıin lýdomanııaǵa, ıaǵnı oıynqumarlyqqa ulasýy múmkin ekenin de jasyrmady.

– Oıyndy júkteýdiń ózi aqsha turady. Pareto zańy bar, bir bala oınap paıda tabady, al jeńile bergen bala sol utysqa umtylýmen ómirin ótkizedi, - deıdi psıholog.

Aıta keteıik, buǵan deıin Oqý-aǵartý mınıstrligi balalardyń bos ýaqytyna mán berý qajettigin eskertken bolatyn.