Psıhıkalyq kemistigi bar azamattardyń quqyqtaryn turǵyndar bile bermeıdi - maman
ALMATY. QazAqparat - Almatyda densaýlyǵynyń mentaldyq kemistigi bar azamattardyń áleýmettik ıntegratsııasy men olarǵa kórsetiletin balamaly qyzmetterdiń damýy talqylandy
Búgin Almatyda «Qazaqstan Respýblıkasyndaǵy mentaldyq kemistigi bar azamattardyń áleýmettik ıntegratsııasy men olarǵa kórsetiletin balamaly qyzmetterdi damytýdyń perspektıvalary» atty dóńgelek stol ótti. Sharany «Aman-saýlyq» Qoǵamdyq qory, Soros Qazaqstan Qorynyń qarjylandyrýymen QR Densaýlyq saqtaý jáne áleýmettik damý mınıstrligimen birlese otyryp uıymdastyrdy.
Sharaǵa QR DSÁDM, jergilikti atqarýshy organ ókilderi, medıtsınalyq JOO men kolledjderiniń, halyqaralyq uıymdar men qorlardyń, áleýmettik-medıtsınalyq UEU ókilderi jáne mentaldi kemistigi bar azamattardyń týystary qatysty.
Dúnıe júzinde mentaldyq kemistigi bar adamdardyń áleýmettik ıntegratsııasy ózekti máselelerdiń biri bolyp otyr. Psıhıkasy buzylǵan adamdardy kemsitý men olardyń stıgmatızatsııasy - psıhıkalyq densaýlyqty qorǵaý salasyndaǵy mańyzdy máselelerdiń biri. Onymen kúresý sharalary Dúnıejúzilik densaýlyq saqtaý uıymy men Dúnıejúzilik psıhıatrııalyq qaýymdastyq qyzmetteriniń basym baǵyttarynyń biri bolyp sanalady.
Otyrys barysynda «Aman-saýlyq» QQ prezıdenti Bahyt Túmenova ótken jyly Qazaqstannyń bes aımaǵynda mentaldyq kemistigi bar azamattardyń áleýmettik ıntegratsııasy máseleleri boıynsha turǵyndardyń habardarlyǵyn arttyrý maqsatynda qoǵamdyq tyńdaýlar ótkizilgenin eske saldy. Sonymen qatar, psıhıkalyq aýytqýshylyqtary bar múgedekterge arnalǵan medıtsınalyq-áleýmettik uıymdar aıasynda áleýmettik kómektiń qoldanystaǵy tetikteriniń tıimdiligin anyqtaý maqsatynda saraptama jasaldy, múgedekterge áleýmettik kómek kórsetý salasyndaǵy memlekettik saıasatty jetildirý jáne kómek kórsetýdiń balamaly tásilderin damytýǵa baǵyttalǵan usynymdar daıyndaldy.
«Aımaqtardaǵy qoǵamdyq tyńdaýlardyń saraptamasy densaýlyǵynyń psıhıkalyq kemistigi bar azamattardyń quqyqtary týraly patsıentter men olardyń týystary, jalpy turǵyndar habardarlyǵynyń tómendigin dáleldedi», - dep atap aıtty Bahyt Túmenova.
Dóńgelek stol aıasynda áleýmettik ÚEU-nyń básekege qabilettiligi men olardyń qyzmetterin tutynýshylar arasyndaǵy suranysy, ÚEU málimetteriniń halyqaralyq standarttarǵa saı bolýy men olardyń qarjylandyrýy jáne t.b. talqylandy.
Esterińizge sala keteıik, 2008 jyldan bastap Qazaqstanda arnaýly áleýmettik qyzmetterdi (ári qaraı - AÁQ) daıyndaý men engizý jumystary bastaldy. AÁQ usynatyn uıymdar jelisin damytý - mańyzdy mindetterdiń biri bolyp tabylady. Atalǵan merzim ishinde olardyń sany 35%-ǵa ulǵaıyp, 2008 jyly 592 uıymnan 2015 jyly 797 uıymǵa deıin artty.áleýmettik qyzmetter usynatyn áleýmettik ÚEU-dy qoldaý memlekettik áleýmettik tapsyrys jáne halyqaralyq granttar arqyly júzege asyrylady.
