Psıhıkalyq derti bar naýqastardy baqylaý men esepten shyǵarý tártibi ózgermek

ASTANA. QazAqparat – Psıhıkalyq derti bar patsıentterdiń jaı-kúıin baqylaý, ony esepke alý men odan shyǵarý elektrondy júıe arqyly júrgiziledi. Mundaı ózgeris týraly «Ashyq» NQA portalynda jarııalanǵan Densaýlyq saqtaý mınıstriniń tıisti buıryǵynda jazylǵan, dep habarlaıdy QazAqparat tilshisi.

«Dárigerlik-konsýltatsııalyq komıssııa sheshiminiń negizinde júzege asyrylatyn dınamıkalyq baıqaýǵa alý, dınamıkalyq baıqaýdy alyp tastaý, esepten shyǵarý jáne dınamıkalyq baıqaýdyń basqa tobyna aýystyrý týraly derekterdi engizý tek elektrondy tsıfrlyq qoltańbamen rastalǵan dárigerlik-konsýltatsııalyq komıssııa músheleriniń logın, paroli arqyly júzege asyrylady», - delingen jańa redaktsııada.

Aıta keteıik, qoldanystaǵy zańnamada mundaı norma joq. Mınıstrlik bergen túsindirme boıynsha bul joba Densaýlyq saqtaýdy damytý tujyrymdamasyna sáıkes mindetti derbes esepke alý jáne MÁMS júıesindegi shyǵystardyń barshaǵa qoljetimdi bolýy úshin usynylyp otyr. Sonymen qosa, endi ýaqytsha beıimdeý jáne detoksıkatsııa ortalyqtaryna qabyldanatyn naýqastardyń kartasy da elektrondy nysanda toltyrylmaq.

«Ýaqytsha beıimdeý jáne detoksıkatsııa ortalyqtaryna jatqyzylǵan patsıenttiń kartasy toltyrylady. Ol qujat statıstıkalyq karta da bolyp esepteledi. Bul protses medıtsınalyq aqparattyq júıeler arqyly da iske asyrylady», - dep kórsetilgen qujatta.

Buıryq jobasyn ashyq talqylaý 28 aqpanǵa deıin jalǵasady.