Psıhıkalyq aýrýlarǵa shaldyqqan naýqastardy jumyspen qamtý úshin emdeý-eńbek etý sheberhanalaryn salý qajet - E.Nurqatov
ASTANA. Jeltoqsannyń 23-i. QazAqparat /Gúlmıra Álıakparova/ - Búgin Astanada psıhıkalyq aýrýlarǵa shaldyqqan adamdardy jumyspen qamtý maqsatynda, olarǵa arnap emdeý-eńbek etý sheberhanalaryn salý jáne túrli sebeptermen buryn jabylǵan sheberhanalardyń jumysyn qaıta jandandyrý máselelerine arnalǵan dóńgelek ústel otyrysy ótti,
dep habarlaıdy QazAqparat.
Іs-sharany Astana qalasy Psıhıkalyq densaýlyq problemalary jónindegi medıtsınalyq ortalyq pen Zańnamalardy saqtaý jáne adam quqyqtary jónindegi halyqaralyq bıýronyń qazaqstandyq fılıaly uıymdastyrdy. Oǵan Parlament jáne máslıhat depýtattary, basqa da memlekettik organdardyń ókilderi men qoǵamdyq uıymdar qatysty.
Atalmysh Medıtsınalyq ortalyqtyń dırektory Erbol Nurqatovtyń aıtýynsha, Keńes Odaǵy kezinde Qazaqstannyń ár aýmaǵynda bolǵan psıhıkalyq kúızelisterge ushyraǵan jandardyń emdeý-eńbek etý sheberhanalarynyń júıesin qaıta qalpyna keltirý qajet. «Keńes Odaǵy taraǵannan keıin olardyń barlyǵy jabyldy, qazirgi kúni ondaı sheberhanalar Qazaqstannyń eshbir aımaǵynda jumys istemeıdi. Bizdiń maqsat Astanadaǵy Medıtsınalyq ortalyqtyń janynan temir jáne aǵash ustalyǵy tsehtary men shaǵyn baspahana ashyp, naýqastarymyzdy jumyspen qamtý», - dep atap ótti ol.
Mamandardyń aıtýynsha, psıhıkalyq naýqastar otbasynda turmaıdy, olardyń basym kópshiliginde januıalary múldem joq, onyń ústine mundaı naýqastarǵa qoǵamnyń kózqarasy kóbine-kóp negatıvti bolyp keledi. Al sheberhanalar olardyń nazaryn eńbekke aýdartyp, saýyǵýyna yqpal etetin bolady.
Sondaı-aq olar, buryn naýqastardyń tapqan qarajatyna atalmysh Medıtsınalyq ortalyq óziniń emdeý-eńbek etý sheberhanasyn salǵanyn aıtady. Biraq qazir olar bos tur. Al olardyń jumysyn qaıta jandandyrý úshin memlekettiń jáne úkimettik emes uıymdardyń tarapynan qoldaý qajet.
E.Nurqatov psıhıkalyq kúızelisterge ushyraǵan jandarǵa balǵa-shegeni birden ustatpaıtyndaryn da aıtady. Eń aldymen, olarǵa irikteý, burynǵy jumysyna qaıta beıimdeý jáne basqa salaǵa mamandandyrýdy júrgizetin Oqytý-daıarlaý ortalyǵy qurylatyndyǵyn jetkizdi. «Bul másele de memlekettik jáne qoǵamdyq uıymdardyń kómegin qajet etedi», - dedi dırektor.
Dóńgelek ústel otyrysynyń nátıjesi boıynsha quzyrly memlekettik organdarǵa Astana qalasynda emdeý-eńbek etý sheberhanalaryn salý usynymdary ázirlendi.
